ہوائے شام نہ جانے کہاں سے آتی ہے

ہوائے شام نہ جانے کہاں سے آتی ہے 

وہاں گلاب بہت ہیں جہاں سے آتی ہے 

یہ کس کا چہرہ دمکتا ہے میری آنکھوں میں 

یہ کس کی یاد مجھے کہکشاں سے آتی ہے 

اسی فلک سے اترتا ہے یہ اندھیرا بھی 

یہ روشنی بھی اسی آسماں سے آتی ہے 

آنکھوں میں اک خواب ہے اس کو یہیں سجاؤں گا

آنکھوں میں اک خواب ہے اس کو یہیں سجاؤں گا 

تھوڑی زمیں ملی تو اک دن باغ لگاؤں گا 

شہر جو تم یہ دیکھ رہے ہو اس میں کئی ہیں شہر 

میرے ساتھ ذرا نکلو تو سیر کراؤں گا 

میرے لیے یہ دیوار و در جیسے ہیں اچھے ہیں 

اس گھر کی آرائش کر کے کسے دکھاؤں گا 

خواب آنکھوں میں سوالی ہی رہے

خواب آنکھوں میں سوالی ہی رہے 

کاسۂ تعبیر خالی ہی رہے 

رقص کرتی خواہشوں کے زیرپا 

دل شکار پائمالی ہی رہے 

خاک ہو جاتے لہو کی آگ میں 

جسم کے کوزے سفالی ہی رہے

نقصان کیا بتائیں ہمارا کیا بہت

نقصان کیا بتائیں ہمارا کِیا بہت 

اس کاروبارِ دل نے خسارا کیا بہت 

چاروں طرف تھے پھول شفق کے کھلے ہوئے 

جس شام آسماں کا نظارا کیا بہت 

اب کیا کروں کہ شور میں آواز دب گئی 

میں اس کو شہرِ جاں میں پکارا کیا بہت 

میں خواب اپنے سارے نیلام کر رہا ہوں

میں خواب اپنے سارے نیلام کر رہا ہوں 

اور یہ بھی جان لو کہ بے دام کر رہا ہوں 

اس سے غرض نہیں ہے بولی لگے گی کیسے 

جو کام کرنا ہے، بس وہ کام کر رہا ہوں 

وہ سب کہانیاں جو پوری نہیں ہوئی تھیں 

تحریر آج ان کا انجام کر رہا ہوں 

کب تک اس کا ہجر مناتا صحرا چھوڑ دیا

کب تک اس کا ہجر مناتا صحرا چھوڑ دیا 

جینے کی امید میں میں نے کیا کیا چھوڑ دیا 

میرے ساتھ لگا رہتا ہے یادوں کا بادل 

دھوپ بھرے رستوں پر اس نے سایہ چھوڑ دیا 

ہر چہرے پر اک چہرے کا دھوکہ ہوتا ہے 

کس نے مجھ کو اس بستی میں تنہا چھوڑ دیا 

بیٹھے بٹھائے آج پھر کس کا خیال آ گیا

بیٹھے بٹھائے آج پھر کس کا خیال آ گیا
چہرے کا رنگ اڑ گیا، رنگِ ملال آ گیا
الجھن میں پڑ گیا ہوں میں دل کا کروں تو کیا کروں
شیشہ نہیں یہ کام کا، اس میں تو بال آ گیا
پورا نہ کر سکوں گا اب، تجھ سے کبھی مکالمہ
آنکھیں تھیں محوِ گفتگو، دل کا سوال آ گیا

تو بھی فریادی ہوا تھا التجا میں نے بھی کی

تُو بھی فریادی ہوا تھا، التجا میں نے بھی کی
تُو نہ تھا مجرم اکیلا، ہاں خطا میں نے بھی کی
ظلم دونوں نے کیا تھا، دونوں تھے اس میں شریک
ابتداء گر تُو نے کی، تو انتہا میں نے بھی کی
صرف تُو نے ہی نہیں کی جستجوئے چارہ گر
درد جب حد سے بڑھا تو کچھ دوا میں نے بھی کی

منظر روز بدل دیتا ہوں اپنی نرم خیالی سے

منظر روز بدل دیتا ہوں اپنی نرم خیالی سے
شام شفق میں ڈھل جاتی ہے رنگِ حنا کی لالی سے
تجھ سے بچھڑ کر زندہ رہنا، اپنے سوگ میں جینا ہے
دل اِک پھُول تھا خُوشبُو والا، ٹُوٹ گیا ہے ڈالی سے
شہرِ طرب کو جانے کس کی نظر لگی ہے آج کی شب
رستے بھی ویران پڑے ہیں، گھر لگتے ہیں خالی سے

ہمیں کچھ اور جینا ہے تو دل کو شاد رکھیں گے

ہمیں کچھ اور جینا ہے تو دل کو شاد رکھیں گے
بہت کچھ بھول جائیں گے بہت کچھ یاد رکھیں گے
ابھی کچھ اور کرتب دیکھنے بھی ہیں، دکھانے بھی
تماشا گاہِ عالم! ہم تجھے آباد رکھیں گے
اگر گھر کا خیال آیا تو رستہ بھُول جائیں گے
سفر میں دشت کو جاتے ہوئے ہم یاد رکھیں گے

کیسے بدل رہے ہو بتاتا نہیں ہے کیا

کیسے بدل رہے ہو بتاتا نہیں ہے کیا
آئینہ کوئی تم کو دِکھاتا نہیں ہے کیا
خلقِ خدا کا خوف تو دل میں نہیں رہا
تم کو خدا کا خوف بھی آتا نہیں ہے کیا
تاریک لگ رہی ہے ہے شبِ ماہتاب بھی
کوئی یہاں چراغ جلاتا نہیں ہے کیا