جس زمیں پر ترا نقش کف پا ہوتا ہے

 جس زمیں پر ترا نقشِ کفِ پا ہوتا ہے

ایک اک ذرہ وہاں قبلہ نما ہوتا ہے

کاش وہ دل پہ رکھے ہاتھ اور اتنا پوچھے

کیوں تڑپ اٹھتا ہے کیا بات ہے کیا ہوتا ہے

بزمِ دشمن ہے خدا کے لیے آرام سے بیٹھ

بار بار اے دلِ ناداں تجھے کیا ہوتا ہے

جمع ہیں سارے مسافر ناخدائے دل کے پاس

 جمع ہیں سارے مسافر ناخدائے دل کے پاس 

کشتئ ہستی نظر آتی ہے اب ساحل کے پاس

سارباں کس جستجو  میں ہے، یہاں مجنوں کہاں

اب بگولا بھی نہ پھٹکے گا تِرے محمل کے پاس

ابتدائے عشق۔۔۔، یعنی ایک مہلک حادثہ

آ گئی ہستی یکا یک موت کی منزل کے پاس

کلیوں کا تبسم ہو کہ تم ہو کہ صبا ہو

کلیوں کا تبسم ہو، کہ تم ہو، کہ صبا ہو
اس رات کے سناٹے میں، کوئی تو صدا ہو
یوں جسم مہکتا ہے ہوائے گلِ تر سے
جیسے کوئی پہلو سے، ابھی اٹھ کے گیا ہو
دنیا ہمہ تن گوش ہے، آہستہ سے بولو
کچھ اور قریب آؤ، کوئی سن نہ رہا ہو

شباب آیا کسی بت پر فدا ہونے کا وقت آیا

شباب آیا، کسی بُت پر فدا ہونے کا وقت آیا
مری دنیا میں بندے کے خدا ہونے کا وقت آیا
تکلم کی خموشی کہہ رہی ہے حرفِ مطلب سے
کہ، اشک آمیز نظروں سے ادا ہونے کا وقت آیا
اسے دیکھا تو زاہد نے کہا، ایمان کی یہ ہے
کہ، اب انسان کو سجدہ روا ہونے کا وقت آیا

آباد اگر نجد کا ویرانہ نہیں ہے

آباد اگر نجد کا ویرانہ نہیں ہے
مجنوں کو بُلا لاؤ، وہ دیوانہ نہیں ہے
ہے شمعِ وفا محفلِ الفت میں ضیا ریز
اس شمع پہ لیکن کوئی پروانہ نہیں ہے
یہ عقل کی باتوں میں تو آئے گا نہ ہرگز
عاشق ترا ہشیار ہے، دیوانہ نہیں ہے