ستم کے مارے لہو میں ڈوبے ہوئے نظاروں کا کیا کروں گا

 ستم کے مارے لہو میں ڈوبے ہوئے نظاروں کا کیا کروں گا 

سسکتے غنچو! تمہیں بتاؤ میں ان بہاروں کا کیا کروں گا 

جنہیں بھروسہ ہو آسماں پر وہ آسماں سے پناہ مانگیں 

میں اپنے ذروں سے مطمئن ہوں میں چاند تاروں کا کیا کروں گا 

اگر مجھے دے سکے زمانہ تو کچھ نئے زخم اور دے دے 

میں غمگساروں کو جانتا ہوں میں غمگساروں کا کیا کروں گا 

خواب آنکھوں میں نہیں دل میں تمنا بھی نہیں

 خواب آنکھوں میں نہیں دل میں تمنا بھی نہیں

عشق مایوس ہوا ہو مگر ایسا بھی نہیں

ان کی الفت میں اٹھائے ہیں ہزاروں الزام

آج تک آنکھ اٹھا کر جنہیں دیکھا بھی نہیں

راہ ہستی میں نگاہیں تو بھٹک سکتی ہیں

دل بھٹک جائے مگر اتنا اندھیرا بھی نہیں

میخانے پہ چھائی ہے افسردہ شبی کب سے

 میخانے پہ چھائی ہے افسردہ شبی کب سے

ساغر سے گریزاں ہے خود تشنہ لبی کب سے

اے سایۂ گیسو کے دیوانو!! بتاؤ تو

معیار جنوں ٹھہری راحت طلبی کب سے

چوسا ہے لہو جس نے برسوں مہ و انجم کا

انساں کا مقدر ہے وہ تیرہ شبی کب سے

وہ جس نے میرے دل و جاں میں درد بویا ہے

 وہ جس نے میرے دل و جاں میں درد بویا ہے

کبھی کبھی مِری حالت پہ خود بھی رویا ہے

بڑھے ہوئے تھے مِری سمت کتنے پیار کے ہاتھ

کہاں یہ لا کے تِری یاد نے ڈبویا ہے

جو پھوٹی پلکوں سے کونپل تو جا کے راز کھُلا

کہ اس نے غم نہیں سینے میں زہر بویا ہے

قلب و نظر کا سکوں اور کہاں دوستو

 قلب و نظر کا سکوں اور کہاں دوستو

کُوئے بُتاں دوستو، کُوئے بُتاں دوستو

میرا ہی دل ہے کہ میں پھرتا ہوں یوں خندہ زن

کم نہیں پردیس میں دل کا زیاں دوستو

جن میں خلوصِ وفا اور نہ شعورِ ستم

مجھ کو بٹھایا ہے یہ لا کے کہاں دوستو

فضائیں کیف بہاراں سے جب مہکتی ہیں

 فضائیں کیفِ بہاراں سے جب مہکتی ہیں

تو دل میں چوٹیں تری یاد کی کسکتی ہیں

شفق کے رنگ بھی ان کا جواب لا نہ سکے

کسی کے چہرے پہ جو سرخیاں دمکتی ہیں

جنہیں تمہارا تبسم ملا ہے وہ نظریں

فضا میں نور کے نغمے بکھیر سکتی ہیں

نہ پیام چاہتے ہیں نہ کلام چاہتے ہیں

 نہ پیام چاہتے ہیں، نہ کلام چاہتے ہیں

مری رات کے اندھیرے ترا نام چاہتے ہیں

جو جگر کو خاک کر دے جو دماغ پھونک ڈالے

مرے پیاسے ہونٹ ایسا کوئی جام چاہتے ہیں

وہ ہو شغل بادہ نوشی کہ طواف کوئے جاناں

غمِ زندگی کے مارے کوئی کام چاہتے ہیں