مست سماں ہے رات جواں ہے مے ہے صراحی چھلکی بھی

مست سماں ہے رات جواں ہے مے ہے صراحی چھلکی بھی

پینے والو! جی بھر کر پی لو، آج ہی پی لو کل کی بھی

آج ہے اپنا رات بھی اپنی، آج منا لو جشن کوئی

کل کو جانے کیا ہو جائے، کس کو خبر ہے پل کی بھی

ڈھونڈنے پہنچی میخانے میں اور خود کو ہی کھو بیٹھی

ایسا رس برسا جیون کا، لگ گئی آنکھ اجل کی بھی

یہ وادیاں ہیں پیار کی یہی یہاں کی ریت ہے

یہ وادیاں ہیں پیار کی یہی یہاں کی ریت ہے

سنبھل گئے تو ہار ہے، بہک گئے تو جیت ہے

یہ مستیاں غلط نہیں، یہ لغزشیں خطا نہیں

یہ مۓ کدہ ہے مہرباں! یہی یہاں کی ریت ہے

میں کس طرح سے ناصحا! خیال ان کا چھوڑ دوں

جنم جنم کا پیار ہے، جنم جنم کی پریت ہے

اٹھاؤ جام غنیمت یہ رات ہے یارو

اٹھاؤ جام، غنیمت یہ رات ہے یارو

کہ اب تو ملنا بھی قسمت کی بات ہے یارو

ہزار یوں تو زمانے کا ساتھ ہے یارو

تمہارے ساتھ کی کچھ اور بات ہے یارو

گزار دو یوں ہی پی پی کے صبح ہونے تک

بڑی طویل جدائی کی رات ہے یارو

سامنے آنکھوں کے گھر کا گھر بنے اور ٹوٹ جائے

سامنے آنکھوں کے گھر کا گھر بنے اور ٹوٹ جائے

کیا کرے وہ جس کا دل پتھر بنے اور ٹوٹ جائے

ہائے رے ان کے فریبِ وعدۂ فردا کا جال

دیکھتے ہی دیکھتے اک در بنے اور ٹوٹ جائے

حادثوں کی ٹھوکروں سے چُور ہونا ہے تو پھر

کیوں نہ خاموشی سے دل ساغر بنے اور ٹوٹ جائے

دنیا بنی تو حمد و ثنا بن گئی غزل

دنیا بنی تو حمد و ثنا بن گئی غزل

اترا جو نور، نورِ خدا بن گئی غزل

گونجا جو نادِ برَہم، بنی رقصِ مہر و ماہ

ذرے جو تھرتھرائے، صدا بن گی غزل

چمکی کہیں جو برق تو احساس بن گئی

چھائی کہیں گھٹا، تو ادا بن گئی غزل 

اک ذرا دل کے قریب آؤ تو کچھ چین پڑے

اِک ذرا دل کے قریب آؤ تو کچھ چین پڑے
جام کو جام سے ٹکراؤ تو کچھ چین پڑے
بیٹھے بیٹھے تو ہر موج سے دل دِہلے گا
بڑھ کے طوفان سے ٹکراؤ تو کچھ چین پڑے
جی اُلجھتا ہے نغمۂ رنگیں سُن کر
گیت ایک درد بھرا گاؤ تو کچھ چین پڑے

ماحول سازگار کرو میں نشے میں ہوں

ماحول سازگار کرو، میں نشے میں ہوں
ذکر نگاہِ یار کرو، میں نشے میں ہوں
اے گردشو! تمہیں ذرا تاخیر ہو گئی
اب میرا انتظار کرو، میں نشے میں ہوں
میں تم کو چاہتا ہوں، تمہیں پر نگاہ ہے
ایسے میں اعتبار کرو، میں نشے میں ہوں

دوستی اپنی جگہ اور دشمنی اپنی جگہ

دوستی اپنی جگہ اور دشمنی اپنی جگہ
فرض کے انجام دینے کی خوشی اپنی جگہ
ہم تو سرگرمِ سفر ہیں اور رہیں گے عمر بھر
منزلیں اپنی جگہ، آوارگی اپنی جگہ
پتھروں کے دیس میں شیشے کا ہے اپنا وقار
دیوتا اپنی جگہ اور آدمی اپنی جگہ

عشق کی مار بڑی دردیلی عشق میں جی نہ پھنسانا جی

عشق کی مار بڑی دردیلی عشق میں جی نہ پھنسانا جی
سب کچھ کرنا، عشق نہ کرنا، عشق سے جان بچانا جی
وقت نہ دیکھے، عمر نہ دیکھے، جب چاہے مجبور کرے
موت اور عشق کے آگے تو کوئی چلے نہ بہانہ جی
عشق کی ٹھوکر موت کی ہچکی دونوں کا ہے ایک اثر
ایک کرے گھر گھر رسوا، ایک کرے افسانہ جی

مجھے دے کے مے میرے ساقیا میری تشنگی کو ہوا نہ دے

مجھے دے کے مے میرے ساقیا! میری تشنگی کو ہوا نہ دے
میری پیاس پر بھی تو کر نظر، مجھے میکشی کی سزا نہ دے
میرا ساتھ، اے میرے ہمسفر! نہیں چاہتا ہے، تو جام دے
مگر اس طرح سرِ راہگزر مجھے ہر قدم پہ صدا نہ دے
میرا غم نہ کر میرے چارہ گر، تیری چارہ جوئی بجا مگر
میرا درد ہے میری زندگی، مجھے دردِ دل کی دوا نہ دے