اک ذرا دل کے قریب آؤ تو کچھ چین پڑے

اِک ذرا دل کے قریب آؤ تو کچھ چین پڑے
جام کو جام سے ٹکراؤ تو کچھ چین پڑے
بیٹھے بیٹھے تو ہر موج سے دل دِہلے گا
بڑھ کے طوفان سے ٹکراؤ تو کچھ چین پڑے
جی اُلجھتا ہے نغمۂ رنگیں سُن کر
گیت ایک درد بھرا گاؤ تو کچھ چین پڑے
داغ کے شعر جوانی میں بھلے لگتے ہیں
میر کی کوئی غزل گاؤ تو کچھ چین پڑے
یادِ ایامِ گزشتہ سے اجازت لے کر
طرزؔ کچھ دیر کو سو جاؤ تو کچھ چین پڑے

گنیش بہاری طرز