اگر تو آگ پر چلتے ہوئے صحرا کے پار آتا

اگر تُو آگ پر چلتے ہوئے صحرا کے پار آتا
تو تیرے راستے میں ہم شہیدوں کا مزار آتا
مجھے جنت سے سیدھا بھیج دینا تھا جہنم میں
کم از کم یہ تو رَستے میں نہ دنیا کا غبار آتا
ہماری بے بسی نے بے یقینی تھام رکھی ہے
ذرا سا اختیار آتا تو تم پر اعتبار آتا
خبر ہوتی اِسے چوکھٹ پہ رکھنا بھی ضروری ہے
تو واللہ! میں ترے رَستے میں اپنا سر نہ ہار آتا
ہوئے جاتے ہیں کھیت، اب آخری عشاق دنیا سے
علم، مستی میں لہراتا، کوئی تو شہسوار آتا
یہ رنگِ عشق و مستی اور یہ کمزوریٔ اعصاب
خبر ہوتی، یہ لمحے عہد بچپن میں گزار آتا
ہماری بے قراری سرد موسم کی عنایت ہے
کسی آتش فشاں دلبر کے پہلو میں قرار آتا

ادریس آزاد