اس میں تخصیص خاص و عام تو نئیں

اس میں تخصیصِ خاص و عام تو نئیں
دل تو دل ہے کوئی غلام تو نئیں
سب مکینوں کا یوں چلے جانا
اس حویلی کا انہدام تو نئیں
خواب میں اس کا مسکرا دینا
دل دھڑکنے کا انتظام تو نئیں
چار سمتوں میں پھیلتی خوشبو
باغ سے پھول کا کلام تو نئیں
جھیلتا ہوں ازل سے در بدری
یہ تِرا مجھ سے انتقام تو نئیں
اس سرائے سے بس گزرنا ہے
اس سرائے میں کچھ قیام تو نئیں
یہ جو پتہ گِرا ہے ٹہنی سے
اس پہ دیکھو ہمارا نام تو نئیں
ہجر ڈھوتا ہوں خوب روتا ہوں
آپ کہتے ہیں کوئی کام تو نئیں
میں وہ لکھوں گا جو میں چاہوں گا
ہو قلم بھی تِرا غلام، تو نئیں

حماد نیازی