اپنے سائے کی رفاقت سے بھی کتراتا ہے

اپنے سائے کی رفاقت سے بھی کتراتا ہے
یوں بھی صحرا میں کوئی آبلہ پا آتا ہے
آنکھ کھلتی ہے تو رِستا ہے لہو پوروں سے
خواب میں ہاتھ کسی شاخ تلک جاتا ہے
دیکھے دیکھے سے مناظر ہیں جنہیں دیکھتا ہوں
وقت میرے ہی کسی خواب کو دُہراتا ہے
ایک دو گھونٹ بس اس زیست کی شیرینی ہے
پھر یہ ساغر کسی زہراب سے بھر جاتا ہے
ایک سایہ سا کہیں رات کی خاموشی میں
نرم پوروں سے مِرے زخم کو سہلاتا ہے
ایسے آتا ہے کوئی پرسشِ احوال کو آج
جیسے زنداں میں کوئی فرمانروا آتا ہے
نیند میں جانبِ صحرا میں نکل جاتا ہوں
پھر مِرا سر کسی دیوار سے ٹکراتا ہے
چلتا رہتا ہے دلِ زار میں تعمیر کا کام
زخم پر ایک نیا زخم جگہ پاتا ہے
میرا ملبہ ہی نمودار ہوا ہو جیسے
یہ جزیرہ جو سرِ آب نظر آتا ہے
میں اسی چاک پہ تکمیلِ ہُنر کرتا ہوں
اسی مٹی میں مِرا خواب نمُو پاتا ہے.
ایسا موسم ہے کہ خُوشبو کو ترستی ہے ہوا
ایسی رُت میں کہاں پیڑوں پہ ثمر آتا ہے

اشرف یوسفی