قطرہ قطرہ نچوڑ کر رکھ دو

قطرہ قطرہ نچوڑ کر رکھ دو
میرے سینے پہ میرا سر رکھ دو
ہم سے بس زندگی نے اتنا کہا
نیزۂ حُسن پر جگر رکھ دو
رجعتِ دائمی کے قدموں میں
کاٹ کر اپنے بال و پَر رکھ دو
اتنا کر دو کہ منزلوں کی جگہ
سارے رستوں پہ رہگزر رکھ دو
تھک گئے ہو اُٹھا اُٹھا کے اِسے
دو گھڑی راستے میں گھر رکھ دو
زہر کا جام ہے ناں  داروغے
رکھ دو، رکھ دو، یہ بے خطر رکھ دو
سر سے شر کو نکال دو لیکن
اپنے پیروں تلے شرر رکھ دو
اُس کی تصویر کو اِدھر رکھ دو
میری تصویر کو اُدھر رکھ دو
آئی آواز مجھ کو وقتِ قیام
کیوں اُٹھا کر کھڑے ہو سر، رکھ دو

ادریس آزاد