اس نے خودی کا نشہ اترنے نہیں دیا

 اس نے خودی کا نشہ اترنے نہیں دیا

خود مر گیا، ضمیر کو مرنے نہیں دیا

آتا ہوا دکھائی دیا تھا وہ دور سے

پھر یہ ہوا کہ ساتھ نظر نے نہیں دیا

احساس تو مجھے بھی سفر میں تھکن کا تھا

سایہ مگر کسی بھی شجر نے نہیں دیا

تسخیر کا وظیفہ کوئی حسب حال سوچ

 تسخیر کا وظیفہ کوئی حسبِ حال سوچ

وہ خود تِرا طواف کرے، وہ کمال سوچ

چہرہ جو اس کا پڑھنا پڑے قسط وار پڑھ

گر سوچنا پڑے تو اسے خال خال سوچ

تحت الثرٰی کو لے کے لگا آسماں پہ جست

جس کو زوال آ نہ سکے، وہ کمال سوچ

تیشۂ عزم سے سر رات کا پھوڑا ہے بہت

 تیشۂ عزم سے سر رات کا پھوڑا ہے بہت

میں نے ظلمت کے طلسمات کو توڑا ہے بہت

یہ بھی کیا کم ہے کہ اس دورِ گراں خوابی میں

میں نے سوئے ہوئے ذہنوں کو جھنجھوڑا ہے بہت

مجھے ضائع نہ کرو، میرے زمانے والو

اچھے فنکار کا اس دَور میں تھوڑا ہے بہت

پھر بعد میں تلاش کرے اور دہائی دے

 پھر بعد میں تلاش کرے، اور دُہائی دے

قیدِ بدن سے خود کو نہ اتنی رہائی دے

ہم سے نسیمِ صبح کے لہجے میں بات کر

ہم لوگ وہ نہیں جنہیں اونچا سنائی دے

جب تیرنے لگوں تو بھنور منتیں کریں

جب ڈوبنے لگوں تو سمندر دُہائی دے

بہنے لگے تو پلکوں سے لف کر دیا گیا

 بہنے لگے تو پلکوں سے لف کر دیا گیا

پھر آنسوؤں کو دُرِ نجف کر دیا گیا

کچھ قہقہوں کی گونج فلک تک سُنائی دی

کچھ سسکیوں کو تابعِ دف کر دیا گیا

جن اُنگلیوں کے زخم ابھی تک نہیں بھرے

تاریخ سے انہی کو حذف کر دیا گیا

کل بھی تلاش رزق میں گزرا تمام دن

 کل بھی تلاشِ رزق میں گزرا تمام دن

اڑتا پھرا فضا میں پرندہ تمام دن

سوچا تھا اپنے سائے کو دیکھوں تو اوڑھ کر

سورج نے مجھ پہ غصہ اتارا تمام دن

تنہائی کا خیال قریب آتا کس لیے

میں اپنا خود شریکِ سفر تھا تمام دن

یادش بخیر جب میں ترا غم اسیر تھا

 یادش بخیر جب میں تِرا غم اسیر تھا

جو اشک ٹوٹتا تھا لہو کی لکیر تھا

مجھ سے چلے ہیں خون چھڑکنے کے سلسلے

میں دشت میں بہار کا پہلا سفیر تھا

وہ رو پڑا خراب و حزیں دیکھ کر مجھے

میں ہنس پڑا کہ دورِ ستم کا اخیر تھا

اتنی ٹھنڈی آہ مت بھر ہوش کر پچھتائے گا

اتنی ٹھنڈی آہ مت بھر، ہوش کر، پچھتائے گا

اس طرح تو جسم میں خون اور بھی جم جائے گا

آپ سورج کو کہیں بھی دفن کر کے دیکھ لیں

جس جگہ بھی مل گیا موقع، وہیں اگ آئے گا

ختم ہونے دے کہانی، بھیگنے دے رات کو

خامشی کا زہر خود چوپال کو چڑھ جائے گا

بارشیں کم ہوں تو سیلاب بھی کم آتے ہیں

یہ جو چہروں پہ لیے گردِ الم آتے ہیں

یہ تمہارے ہی پشیمانِ کرم آتے ہیں

اتنا کھل کر بھی نہ رو، جسم کی بستی کو بچا

بارشیں کم ہوں تو سیلاب بھی کم آتے ہیں

تُو سنا!! تیری مسافت کی کہانی کیا ہے

میرے رستے میں تو ہر گام پہ خم آتے ہیں

میرے خلاف ابر کی سازش نہیں رکی

میرے خلاف، ابر کی سازش نہیں رکی

چھت گر پڑی ہے اور ابھی بارش نہیں رکی

چہرے تھے قتل گاہ کے چاروں طرف مگر

مقتول کے لہو کی نمائش نہیں رکی

دیکھا جو چور آنکھ سے اس نے مِری طرف

سینے میں ایک لمحے کو خواہش نہیں رکی

پیہم جب اضطراب سے سینہ دو چار تھا

پیہم جب اضطراب سے سینہ دو چار تھا

میں زندگی کی تازہ صفوں میں شمار تھا

موسم میں جان تھی نہ چمن پر نکھار تھا

جشنِ بہار اب کے خلافِ بہار تھا

یہ باغباں کے فیض سے پہلے کی بات ہے

ہر شاخ کے گلے میں گلابوں کا ہار تھا

میں سائبان سر پہ جو تانوں کرائے کا

میں سائبان سر پہ جو تانوں کرائے کا

اتنا بھی اشتیاق نہیں مجھ کو سائے کا

مفہومِ عافیت کو سمجھنے کے باوجود

حق چاہتی ہے خامشی، اظہارِ رائے کا

آہنگ و صوت سے ہے مبرا مِرا سخن

خود خامشی ہے اب مِری غزلوں کی گائیکا

قلم کی نوک جہاں کامیاب ٹھہرے گی

قلم کی نوک جہاں کامیاب ٹھہرے گی

لہو لکیر، خطِان قلاب ٹھہرے گی

کبھی تو ہجر زدوں کا نصیب جاگے گا

کبھی تو آنکھ گنہگارِ خواب ٹھہرے گی

کسی کے ہاتھ تو لگنا ہے اشکِ خونیں کو

کسی کنارے تو شاخِ گلاب ٹھہرے گی

میں انقلاب کا پیغام لے کے آیا ہوں

قصۂ پارینہ

مِرے بزرگو، مِرے ساتھیو، مرے بیٹو 

تمہارے واسطے انعام لے کے آیا ہوں 

میں انقلاب کا پیغام لے کے آیا ہوں

یہ رشوتیں ، یہ سمگلنگ یہ چور بازاری 

سیاہ داغ ہیں پیشانئ گلستاں پر 

حیات بوجھ بنی جا رہی ہے انساں پر

کیا ہوئے وہ ستارہ فام سے لوگ

کیا ہوئے وہ ستارہ فام سے لوگ

منحرف ہو گئے ہیں شام سے لوگ

کچھ تو دریائے عشق میں ہے ناں

آن گرتے ہیں جو دھڑام سے لوگ

یہ کہانی کا کون سا دن ہے

بیٹھ جاتے ہیں آ کے شام سے لوگ

چاند کا حال برا لگتا ہے

چاند کا حال بُرا لگتا ہے

جیسے کشکول پڑا لگتا ہے

جس طرف جاؤں جُھکا لگتا ہے

آسماں پہنچا ہوا لگتا ہے

کرسئ عدل گِری پڑتی ہے

کوئی سولی پہ چڑھا لگتا ہے

دیکھ لو گے ابھی دیکھا کیا ہے

دیکھ لو گے ابھی دیکھا کیا ہے

تم نہیں جانتے، دنیا کیا ہے

ڈال جاتا ہے کوئی خاک میں جان

ورنہ، یہ خاک کا پتلا کیا ہے

مانگنے والا تو بن، بعد میں دیکھ

دینے والا تجھے، دیتا کیا ہے

اس نے کل گاؤں سے جب رخت سفر باندھا تھا

اس نے کل گاؤں سے جب رختِ سفر باندھا تھا

بچہ آغوش میں تھا، پُشت پہ گھر باندھا تھا

انگلیوں پر بھی نچایا ہےسمندر ہم نے

ہم نے اک دور میں چپو سے بھنور باندھا تھا

اب جو دم گھٹتا ہے زنداں میں تو روتے کیوں ہو

تمہی لوگوں نے تو دیوار کو در باندھا تھا

ترا بیمار اچھا ہو رہا ہے

تِرا بیمار اچھا ہو رہا ہے

یہ پہلی بار ایسا ہو رہا ہے

اچانک دل جو پسپا ہو رہا ہے

کہیں سے چھپ کے حملہ ہو رہا ہے

تِری تصویر اتاری جا رہی ہے

تِرے پیکر کا چربہ ہو رہا ہے

دل کہیں بھی نہیں لگتا ہو گا

دل کہیں بھی نہیں لگتا ہو گا

دل نہیں مانتا ایسا ہو گا

جتنا ہنگامہ زیادہ ہو گا

آدمی اتنا ہی تنہا ہو گا

چلتا پھرتا ہے ستارہ میرا

اب کہیں اور چمکتا ہو گا