چاند کا حال برا لگتا ہے

چاند کا حال بُرا لگتا ہے

جیسے کشکول پڑا لگتا ہے

جس طرف جاؤں جُھکا لگتا ہے

آسماں پہنچا ہوا لگتا ہے

کرسئ عدل گِری پڑتی ہے

کوئی سولی پہ چڑھا لگتا ہے

پاؤں پکڑے ہوئے بیٹھی ہے بہار

پاؤں میں کانٹا چُبھا لگتا ہے

رہگزر چلتی ہوئی لگتی ہے

قافلہ ٹھہرا ہوا لگتا ہے

بس یونہی گھاٹ پہ جا بیٹھتا ہوں

ورنہ دریا میرا کیا لگتا ہے

عشق کا روگ بُرا ہے بیدلؔ

جس کو لگتا ہے، بُرا لگتا ہے

بیدل حیدری