کیوں کہا یہ کسی سے کیا مطلب
اسی کہنے سے کھل گیا مطلب
بات پوری نہیں کہی میں نے
کہ وہ طرار لے اُڑا مطلب
میں کہے جاؤں تم سنے جاؤ
ہے مِرا درد آپ کی راحت
ہے مِری یاس آپ کا مطلب
مٹ گئے ایک ہی تغافل میں
شوق ارماں مدعا مطلب
اُنکی جانب سے ہو پیام وصال
ہے نئی چاہ کا نیا مطلب
غیر کا خط بھی چاک کر ڈالا
مل گیا تھا جو کچھ میرا مطلب
باندھ کر خط پر کبوتر پر
لکھ دیا ہم نے جابجا مطلب
مر گیا مثردہ وصال سے میں
یوں بھی نکلا رقیب کا مطلب
کبھی کہتا ہوں دل سے خوب کیا
کبھی کہتا ہوں کیوں کہا مطلب
بے غرض تھے تو لطف صحبت تھا
دشمن وضع ہو گیا مطلب
بے خودی میں رہا نہ یاد القاب
خط میں پہلے ہی لکھ دیا مطلب
دل میں گھٹ گھٹ کے رہ گئی حسرت
لب پہ آ آ کے رہ گیا مطلب
حضرت داغؔ توبہ کرتے ہیں
کاش پورا کرے خدا مطلب
داغ دہلوی
No comments:
Post a Comment