عشق کے منبر و محراب الگ ہوتے ہیں

 بندگی کرنے کے آداب الگ ہوتے ہیں

عشق کے منبر و محراب الگ ہوتے ہیں

دل کا آزار کبھی جان نہیں لے سکتا

جان سے جانے کے اسباب الگ ہوتے ہیں

عشق اندیشۂ عبرت سے نکلتا ہی نہیں

دل الگ ہوتا ہے، اعصاب الگ ہوتے ہیں

سیلابوں کے بعد ہم ایسے دیوانے ہو جاتے ہیں

 سیلابوں کے بعد ہم ایسے دیوانے ہو جاتے ہیں

اپنے گھر سے اس کے گھر تک پہروں دوڑ لگاتے ہیں

ہم نے اپنے ہاتھ زمیں میں داب رکھے ہیں اس ڈر سے

دستِ طلب پھیلانے والے دیوانے کہلاتے ہیں

ان آنکھوں کی سیوا کر کے ہم نے جادو سیکھ لیا

جب بھی طبیعت گھبراتی ہے پتھر کے ہو جاتے ہیں

مجھے ملال بھی اس کی طرف سے ہوتا ہے

مجھے ملال بھی اس کی طرف سے ہوتا ہے

مگر یہ حال بھی اس کی طرف سے ہوتا ہے

میں ٹوٹتا بھی ہوں اور خود ہی جڑ بھی جاتا ہوں

کہ یہ کمال بھی اس کی طرف سے ہوتا ہے

پکارتا بھی وہی ہے مجھے سفر کے لیے

سفر محال بھی اس کی طرف سے ہوتا ہے

گزر چکا ہے زمانہ وصال کرنے کا

 گزر چکا ہے زمانہ وصال کرنے کا

یہ کوئی وقت ہے تیرے کمال کرنے کا

برا نہ مان جو پہلو بدل رہا ہوں میں

مِرا طریقہ ہے یہ عرض حال کرنے کا

مجھے اداس نہ کر ورنہ ساکھ ٹوٹے گی

نہیں ہے تجربہ مجھ کو ملال کرنے کا

کیا دیوانہ ہو گیا تھا میں

 کیا دیوانہ ہو گیا تھا میں

موت کو مارنے چلا تھا میں

اس زمانے میں اس نے ساتھ دیا

جس زمانے میں بے وفا تھا میں

غم نے یک طرفہ کر دیا ورنہ

ایک دو طرفہ راستہ تھا میں

خود ہی تسلیم بھی کرتا ہوں خطائیں اپنی

 خود ہی تسلیم بھی کرتا ہوں خطائیں اپنی

اور تجویز بھی کرتا ہوں سزائیں اپنی

کوئی دیکھے تو اداکاریاں کرنا اس کا

بند آئینے میں کرتی ہے ادائیں اپنی

میں سخنور ہوں سو خاموش نہیں رہ سکتا

میں نے آنکھوں میں بسائی ہیں صدائیں اپنی

مرے بارے میں کچھ سوچو مجھے نیند آ رہی ہے

 مِرے بارے میں کچھ سوچو مجھے نیند آ رہی ہے

مجھے ضائع نہ ہونے دو، مجھے نیند آ رہی ہے

مِرے اندر کے دُکھ چہرے سے ظاہر ہو رہے ہیں

مِری تصویر مت کھینچو، مجھے نیند آ رہی ہے

تو کیا سارے گِلے شکوے ابھی کر لو گے مجھ سے

کچھ اب کل کے لیے رکھو، مجھے نیند آ رہی ہے

مٹی ہو کر عشق کیا ہے اک دریا کی روانی سے

 مٹی ہو کر عشق کیا ہے اک دریا کی روانی سے

دیوار و در مانگ رہا ہوں میں بھی بہتے پانی سے

بے خبری میں ہونٹ دِیے کی لو کو چومنے والے تھے

وہ تو اچانک پھوٹ پڑی تھی خوشبو رات کی رانی سے

وہ مجبوری موت ہے جس میں کاسے کو بنیاد ملے

پیاس کی شدت جب بڑھتی ہے ڈر لگتا ہے پانی سے

پوچھا جو میں نے جان سے جانا پڑے گا کیا

پوچھا جو میں نے جان سے جانا پڑے گا کیا

“جل کر کہا پھر اس نے ”بتانا پڑے گا کیا

اے چشمِ دوست! میرے گریباں کی سمت دیکھ

وحشت کا بوجھ یوں بھی اٹھانا پڑے گا کیا

آخر کہاں چلا گیا دل سے نشاطِ غم

اے زندگی! تجھے بھی منانا پڑے گا کیا

ہم اپنے ذہن پر پہلے اسے طاری کریں گے

ہم اپنے ذہن پر پہلے اسے طاری کریں گے

پھر اس کے بعد اپنے قلب کو جاری کریں گے

ہم اپنے ظاہر و باطن کا اندازہ لگا لیں

پھر اس کے سامنے جانے کی تیاری کریں گے

محبت ہم سے اس کو ہو گئی تو ٹھیک ورنہ

ہم اپنی ساکھ رکھنے کو اداکاری کریں گے

سماعتوں کے لیے راز چھوڑ آئے ہیں

سماعتوں کے لیے راز چھوڑ آئے ہیں

ہم اس کے شہر میں آواز چھوڑ آئے ہیں

ہم اس کی سوچ میں امکانِ انتہا سے الگ

نیا سفر، نیا آغاز چھوڑ آئے ہیں

مذاکرات، سرِ وصل کامیاب رہے   

جو کچھ کِیا تھا پس انداز چھوڑ آئے ہیں

اچھا ہے وہ بیمار جو اچھا نہیں ہوتا

اچھا ہے وہ بیمار، جو اچھا نہیں ہوتا

جب تجربے ہوتے ہیں تو دھوکا نہیں ہوتا

جس لفظ کو میں توڑ کے خود ٹوٹ گیا ہوں

کہتا بھی تو وہ اس کو گوارا نہیں ہوتا

تکذیبِ جنوں کیلئے اک شک ہی بہت ہے

بارش کا سمے ہو تو ستارا نہیں ہوتا

دلاسا دے وگرنہ آنکھ کو گریہ پکڑ لے گا

دلاسہ دے، وگرنہ آنکھ کو گِریہ پکڑ لے گا

تِرے جاتے ہی پھر مجھ کو غمِ دنیا پکڑ لے گا

سفر گو واپسی کا ہے، مگر تُو ساتھ رہ میرے

مجھے یہ خوف ہے مجھ کو میرا سایہ پکڑ لے گا

تُو اپنے دل ہی دل میں بس مجھے آواز دیتا رہ

سماعت کو مِری ورنہ یہ سناٹا پکڑ لے گا

اس کی جز بز سے پریشان نہیں ہو سکتا

اس کی جزبز سے پریشان نہیں ہو سکتا

دل اگر دل ہے، تو ہلکان نہیں ہو سکتا

یاد اس کی ہے تو برباد نہیں ہوسکتی

ذہن میرا ہے تو بے دھیان نہیں ہو سکتا

کس قناعت سے رہا گھر مِرے آ کر مہمان

یہ کوئی اور ہے، مہمان نہیں ہو سکتا

بازار کی گرمی کو حدت نہیں گردانا

بازار کی گرمی کو حِدت نہیں گردانا

قیمت کو کسی شے کی قیمت نہیں گردانا

نیلام کِیا ہم نے حساس طبیعت کو 

جب دل نے تمنا کو حسرت نہیں گردانا

دکھ ہجر کے کھولے ہیں بستر کی اذیت نے

تکیے کو سرہانے کی خدمت نہیں گردانا

رت بدلتی ہے تو آثار بدل جاتے ہیں

رُت بدلتی ہے، تو آثار بدل جاتے ہیں

اٹھیے چوپال سے تو یار بدل جاتے ہیں

ایک دو دن کوئی دستک نہیں دیتا ہے اگر

میرے گھر کے در و دیوار بدل جاتے ہیں

کچھ تو کردار بدلتے ہیں کہانی اپنی

کچھ کہانی کے بھی کردار بدل جاتے ہیں

عشق صادق ہی تو معیار طلب کرتا ہے

عشقِ صادق ہی تو معیار طلب کرتا ہے
یہ سکوں بانٹ کے آزار طلب کرتا ہے
جس کی گرمی سے مہک اٹھتا ہے پندارِ وفا
شعلۂ عشق، وہ دلدار طلب کرتا ہے
اک جہاں، وہ بھی مکمل سا، مِلے ہے کس کو
قلبِ معصوم تو بے کار طلب کرتا ہے

جذبہ چھپا تھا یوں بھی خریدار میں بہت

جذبہ چھپا تھا یوں بھی خریدار میں بہت
چرچا رہا تھا حُسن کا بازار میں بہت
ان سے نظر مِلی تو خِرد دَم بخود ہوئی
یوں تو یگانہ ہم بھی تھے گُفتار میں بہت
قیمت تو کیا، نگاہِ خریدار تک نہیں
ہیں خواب یُوں تو کُوچہ و بازار میں بہت

خیال و خواب کو پابند خوئے یار رکھا

خیال و خواب کو پابندِ خوئے یار رکھا
سو دل کو دل کی جگہ ہم نے بار بار رکھا
اسے بھی میں نے بہت خود پہ اختیار دِیے
اور اس طرح کہ بہت خود پہ اختیار رکھا
دکھوں کا کیا ہے مجھے فکر ہے کہ اس نے کیوں
بچھڑتے وقت بھی لہجے کو خوشگوار رکھا

چراغ راہگزر ہے جلا رہے گا وہ

چراغِ راہ گزر ہے جلا رہے گا وہ
مگر ہوا کے لیے مسئلہ رہے گا وہ
کہاں ہے ہجر میں رہنے کا تجربہ اس کو
تمام عمر دعا مانگتا رہے رہے گا وہ
جگہ بدلنے سے ہیئت کہاں بدلتی ہے
جو آئینہ ہے، سدا آئینہ رہے گا وہ