عشق صادق ہی تو معیار طلب کرتا ہے

عشقِ صادق ہی تو معیار طلب کرتا ہے
یہ سکوں بانٹ کے آزار طلب کرتا ہے
جس کی گرمی سے مہک اٹھتا ہے پندارِ وفا
شعلۂ عشق، وہ دلدار طلب کرتا ہے
اک جہاں، وہ بھی مکمل سا، مِلے ہے کس کو
قلبِ معصوم تو بے کار طلب کرتا ہے
جس کی خُوشبو ہو سفیرانِ ادب میں ہر سُو
اک غزل ایسی بھی فنکار طلب کرتا ہے
رَت جگے کر کے وہ افکار کی وادی کے سپرد
صبحِ خُوش رنگ کو ہر بار طلب کرتا ہے
شہرِ خُوش رنگ، تسلی، نہ وضاحت نہ سلوک
دل وہ بچہ ہے جو سنسار طلب کرتا ہے
کیا معمہ ہے، عجب شوقِ جنوں ہے اس کو
رشتۂ دل میں بھی دیوار طلب کرتا ہے
یوں تو ہے وجہِ سکوں وحشتِ جاں، پھر کیونکر
یہ دلِ سادہ بھی بازار طلب کرتا ہے
صرف اقرارِ محبت نہیں اس کو کافی
وہ عمل سے بھی تو اظہار طلب کرتا ہے
بُوئے سلطانی تو ہے، ہو نہ ریاست، نہ سہی
وہ اٹھے جب بھی تو دستار طلب کرتا ہے
ہر یقیں آج گماں اور گماں جیسے یقیں
اب جنوں، دشت سے گھر بار طلب کرتا ہے
دل کہ عادی ہُوا اس درد کا اے راحتِ جاں
یوں نیا دُکھ تِرا بیمار طلب کرتا ہے

محسن اسرار