عشق بول اٹھتا ہے اظہار وفا سے پہلے

عشق بول اٹھتا ہے اظہارِ وفا سے پہلے
دل دھڑکتا ہے نگاہوں کی صدا سے پہلے
یہ پشیماں سی نظر، یہ عرق آلود جبیں
تم نہ تھے اتنے حسِیں ترکِ وفا سے پہلے
سوچتے ہیں اسے کس نام سے منسوب کریں
رنگ آتا ہے جو اس رخ پہ حیا سے پہلے
میکدہ یوں نہیں ملنے کا تجھے اے واعظ
پوچھ رستہ مِرے نقشِ کفِ پا سے پہلے
لُٹ گیا قافلہ کیا کہیے کہ لُوٹا کس نے
راہ میں کوئی نہ تھا راہنما سے پہلے
چھُو کے اس عارضِ رنگیں کو ہُوا ہے معلوم
عشق ایک جُرمِ مسلسل تھا خطا سے پہلے
ان چراغوں کا مقدر بھی ہے کتنا تاریک
بجھ گئے جو تِرے دامن کی ہوا سے پہلے
سانس لینے کو سمجھتے ہیں حیات اے شاعر
لوگ واقف تو ہوں جینے کی ادا سے پہلے

شاعر لکھنوی