اک رند بنا مولانا تو میں خوب ہنسا

میں خوب ہنسا

اک رِند بنا مولانا تو میں خوب ہنسا

اس نے چاہا مجھے سمجھانا تو میں خوب ہنسا

میں پہلے تو رویا واعظ کی دھمکی پر

چلتا ہی رہا مے خانہ تو میں خوب ہنسا

جس شہر سے تھی آبائے شہر کو ہمدردی

وہ شہر بنا ویرانہ تو میں خوب ہنسا

اک جیّد مفتئ شہر کی کافر سازی سے

آباد ہوا بت خانہ تو میں خوب ہنسا

جو شخص مرے گھر چوری کرتے پکڑا گیا 

وہ نکلا یار پرانا تو میں خوب ہنسا

اس دور میں کچھ رِندوں کی چھِینا جھَپٹی سے

جب ٹوٹ گیا پیمانہ تو میں خوب ہنسا

صحرا کو چھوڑ کے اپنے شہر پہنچنے پر

پچھتایا جب دیوانہ تو میں خوب ہنسا

اس چوکھٹ پر میں گیا تو پیر و مرشد کے

سب ٹھاٹھ ملے شاہانہ تو میں خوب ہنسا

جب کرسی چھُوٹی اور مفاد پرستوں سے

باقی نہ رہا یارانہ تو میں خوب ہنسا

کچھ لوگ قتیلؔ الرجک تھے موسیقی سے

چڑیوں نے نہ چھوڑا گانا تو میں خوب ہنسا

قتیل شفائی