جذبہ چھپا تھا یوں بھی خریدار میں بہت

جذبہ چھپا تھا یوں بھی خریدار میں بہت
چرچا رہا تھا حُسن کا بازار میں بہت
ان سے نظر مِلی تو خِرد دَم بخود ہوئی
یوں تو یگانہ ہم بھی تھے گُفتار میں بہت
قیمت تو کیا، نگاہِ خریدار تک نہیں
ہیں خواب یُوں تو کُوچہ و بازار میں بہت
اچھائی اور بُرائی کا محور ہے آدمی
شفاف ہے پہ داغ بھی کِردار میں بہت
اے ربِ ذوالجلال! تُو ان کی تو لاج رکھ
نادِم ہیں اشک، چشمِ گُنہگار میں بہت
آتی ہے کیا کہیں سے کوئی بھی نویدِ صبح
پڑھیے تو زخم چھَپتے ہیں اخبار میں بہت
اپنوں کو چھوڑیئے میاں خالدؔ کہ آج کل
ہیں فکر مند آپ کے اغیار میں بہت

محسن اسرار