حسن ہیرے کی کنی ہو جیسے

 حسن ہیرے کی کنی ہو جیسے

اور مِری جاں پہ بنی ہو جیسے

تیری چتون کے عجب تیور ہیں

سر پہ تلوار تنی ہو جیسے

ریزہ ریزہ ہوئے مینا و ایاغ

رِند و ساقی میں ٹھنی ہو جیسے

جو درد دل کہو آہستہ بولو

 جو دردِ دل کہو، آہستہ بولو 

خوشی سے غم سہو آہستہ بولو 

فغاں کرنا بھی جرم عاشقی ہے 

بڑے چوکس رہو، آہستہ بولو 

تمہاری آہ بھی ہے بار خاطر 

تکلم کے شہو! آہستہ بولو 

گرد اڑے یا کوئی آندھی ہی چلے

 گرد اڑے یا کوئی آندھی ہی چلے

یہ امس تو کسی عنوان ٹلے

انگ پر زخم لیے خاک ملے

آن بیٹھے ہیں ترے محل تلے

اپنا گھر شہر خموشاں سا ہے

کون آئے گا یہاں شام ڈھلے

کار زار عشق و سر مستی میں نصرت یاب ہوں

 کارزارِ عشق و سر مستی میں نصرت یاب ہوں

وہ جنونی دار تک جانے کو جو بے تاب ہوں

کوہساروں پر سوا نیزے پہ سورج آئے تو

چوٹیوں کی برف پگھلے وادیاں سیراب ہوں

دوسرے ساحل پہ کوئی سوہنی ہو منتظر

ہم مہینوالوں کے آگے بحر بھی پایاب ہوں

فسوں ٹوٹتا ہے

 فسوں ٹوٹتا ہے

یہ تجریدی خاکوں کی تصویر گہ ہے

مِرا منہ چِڑانے کو دیوار و در پر کئی مسخ پیکر ٹنگے ہیں

مجھے گھورتے ہیں، ڈراتے ہیں مجھ کو

میں ان سیدھی‌ الٹی لکیروں کے دامِ ریا میں الجھ گیا ہوں

بالآخر فسونِ ریا ٹوٹتا ہے

خوش قسمت ہیں وہ جو گاؤں میں لمبی تان کے سوتے ہیں

خوش قسمت ہیں وہ جو گاؤں میں لمبی تان کے سوتے ہیں

ہم تو شب بھر شہر کے شور میں اپنی جان کو روتے ہیں

کس کس درد کو اپنائیں اور کس کس زخم کو سہلائیں

دیکھتی آنکھوں قدم قدم پر کئی حوادث ہوتے ہیں

دل کی دِلی لٹ گئی، آس کے ایوانوں میں غدر مچا

خودداری کے مغل شہزادے شہر میں ٹھلیا ڈھوتے ہیں

عجز بن اس کی سبھا میں کیا کسی کو چارہ تھا

عجز بِن اس کی سبھا میں کیا کسی کو چارہ تھا

واں تو ہر شوریدہ کے سر پر چمکتا آرہ تھا

ہائے وہ دن جب کسی فریاد پر قدغن نہ تھی

درد کی ہر لہر زخمہ اور میں اِکتارہ تھا

اس نے دل میں جھانکنے کی مجھ کو مہلت ہی نہ دی

شوخ کے طرزِ تکلم ہی میں کیا چٹخارہ تھا