عجز بن اس کی سبھا میں کیا کسی کو چارہ تھا

عجز بِن اس کی سبھا میں کیا کسی کو چارہ تھا

واں تو ہر شوریدہ کے سر پر چمکتا آرہ تھا

ہائے وہ دن جب کسی فریاد پر قدغن نہ تھی

درد کی ہر لہر زخمہ اور میں اِکتارہ تھا

اس نے دل میں جھانکنے کی مجھ کو مہلت ہی نہ دی

شوخ کے طرزِ تکلم ہی میں کیا چٹخارہ تھا

شاہ کے دربار میں ٹوڈی کے سُر محبوس تھے

آہوئے دل اس گھڑی صحراؤں میں آوارہ تھا

حسن تیرا برگِ گل تھا یا پرِ طاؤس تھا

دل مِرا دینِ مبینِ عشق کا سیپارہ تھا

وصل اک لمحہ تھا لیکن نقش ہو کر رہ گیا

ورنہ کہنے کو غزالِ دشت کا طرارہ تھا

کتنے چاؤ سے کِیا تھا ہم نے آغازِ سفر

زادِ رہ معصوم آہوں کا اِک پُشتارہ تھا

گاؤں کو پرویزؔ نے تیاگا تو پھر لوٹا نہیں

ایک جھونکا تھا کوئی جوگی تھا بنجارہ تھا

افضل پرویز