عجب نہیں جو محبت مری سرشت میں ہے

عجب نہیں جو محبت مِری سرشت میں ہے

یہی شرار نہاں روحِ سنگ و خشت میں ہے

نہ بجلیوں کو خبر ہے نہ خوشہ چیں کو پتہ

کہ اِک نہال تمنا ہماری کشت میں ہے

یہ رنگ و نور کے نغمے یہ دلکشا جلوے

صنم کدے ہیں کہ ذوقِ نظر بہشت میں ہے

ابھی نگاہ پہ ہیں  رسم و وہم کے پردے

ابھی خیال طِلسماتِ خوب و زشت میں ہے

حرم کے دیدہ وروں سے پتہ ملا عابدؔ

کہ ڈھونڈنے جسے نکلے ہو وہ کنشت میں ہے

عابد علی عابد