قحط وفائے وعدہ و پیماں ہے ان دنوں

قحطِ وفائے وعدہ و پیماں ہے ان دنوں

زوروں پہ احتیاطِ دل و جاں ہے ان دنوں

مطعون ہیں جو موسمِ گل کے جنوں میں ہیں

متروک رسمِ چاک گریباں ہے ان دنوں

یہ رسمِ رفتگاں تھی، فراموش ہو گئی

اپنے کیے پہ کون پشیماں ہے ان دنوں

آنکھیں ہیں خشک صورتِ صحرائے بے گیاہ

سینہ ہجومِ اشک سے گریاں ہے ان دنوں

یہ کیسا عہد ہے کہ مِری چشمِ خواب میں

نقشِ قدم بھی دیدۂ حیراں ہے ان دنوں

ڈرتا ہوں اپنے سانس کی سنتا ہوں جب صدا

دہشت بہت قریبِ رگِ جاں ہے ان دنوں

دیدہ وروں کے گھر پہ مسلط ہے تیرگی

اندھوں کی انجمن میں چراغاں ہے ان دنوں

بدتر ہے جانور سے بھی دانشوروں کا حال

جو سوچتا نہیں ہے وہ انساں ہے ان دنوں

ہر بوالہوس دھنی ہے مقدر کا آج کل

ہر بے ضمیر صاحبِ امکاں ہے ان دنوں

تجھ سے گِلہ نہیں ہے کہ تُو پھر بھی غیر تھا

میرا وجود مجھ سے گریزاں ہے ان دنوں

جی چاہتا ہے روئے زمیں پر بکھیر دوں

جو درد میری روح میں پنہاں ہے ان دنوں

کیسے چھڑاؤں، کیسے لکھوں، شرحِ دردِ نو

ہر ایک لفظ زینتِ زنداں ہے ان دنوں

یادوں کے پھول حدِ نظرؔ تک کھلے ہیں پھر

دشتِ فراق، رشکِ گلستاں ہے ان دنوں

ظہور نظر