ڈھونڈتے ہو جسے دفینوں میں

 ڈھونڈتے ہو جسے دفینوں میں

وہی وحشی ہے سب کے سینوں میں

میرے قابیل کی روایت ہیں

پُرزے جتنے بھی ہیں مشینوں میں

صبحدم پھر سے بانٹ دی کس نے

تیرگی شہر کے مکینوں میں

اشک جب دیدۂ تر سے نکلا

 اشک جب دیدۂ تر سے نکلا

ایک کانٹا سا جگر سے نکلا

پھر نہ میں رات گئے تک لوٹا

ڈوبتی شام جو گھر سے نکلا

ایک میت کی طرح لگتا تھا

چاند جب قید سحر سے نکلا

مجھ سے نفرت کی عجب راہ نکالی اس نے

مجھ سے نفرت کی عجب راہ نکالی اس نے

میرے دشمن سے بہت دوستی پالی اس نے

وہ میرے در کی روایت سے بہت واقف تھا

میرا سر مانگ لیا بن کے سوالی اس نے

میری میت سے اسے آۓ گی اپنی خوشبو 

بس یہی سوچ کے مٹی نہیں ڈالی اس نے

اسی لئے نہیں مانوس کائنات سے میں

اسی لیے نہیں مانوس کائنات سے میں

ہر ایک لمحہ بچھڑتا ہوں اپنی ذات سے میں

مِرے غروب کا ماتم نہ کر میں زندہ ہوں 

کہ مجھ سے رات پِنپتی ہے اور رات سے میں

ابھی تو سانس کے زِنداں سے آ رہی ہے صدا 

تھکا نہیں ہوں ابھی شرحِ حادثات سے میں

رات بھی اب نڈھال ہے بابا

رات بھی اب نڈھال ہے بابا

روشنی کا سوال ہے بابا

کچھ نہيں خدوخال کی صورت

سب تمنا کا جال ہے بابا

يہ سمندر تو سوکھ جاتے ہيں

تشنگی لازوال ہے بابا

اپنا دکھ اپنا ہے پیارے غیر کو کیوں الجھاؤ گے

اپنا دکھ اپنا ہے پیارے غیر کو کیوں الجھاؤ گے

اپنے دکھ میں پاگل ہو کر اب کس کو سمجھاؤ گے

درد کے صحرا میں لاکھوں امید کے لاشے گلتے ہیں

ایک ذرا سے دامن میں تم کس کس کو کفناؤ گے

توڑ بھی دو احساس کے رشتے چھوڑ بھی دو دکھ اپنانے

رو رو کے جیون کاٹو گے، رو رو کے مر جاؤ گے

جرم ہستی کی سزا کیوں نہیں دیتے مجھ کو

جرمِ ہستی کی سزا کیوں نہیں دیتے مجھ کو

لوگ جینے کی دعا کیوں نہیں دیتے مجھ کو

صرصرِ خوں کے تصور سے لرزتے کیوں ہو

خاکِ صحرا ہوں، اڑا کیوں نہیں دیتے مجھ کو 

کیوں تکلف ہے مِرے نام پہ تعزیروں کا

میں برا ہوں تو بھُلا کیوں نہیں دیتے مجھ کو

ہر بت یہاں ٹوٹے ہوئے پتھر کی طرح ہے

ہر بت یہاں ٹوٹے ہوئے پتھر کی طرح ہے

یہ شہر تو اجڑے ہوئے منظر کی طرح ہے

میں تشنۂ دیدار کہ جھونکا ہوں ہوا کا

وہ جھیل میں اترے ہوئے منظر کی طرح ہے

کم ظرف زمانے کی حقارت کا گِلہ کیا

میں خوش ہوں، مِرا پیار سمندر کی طرح ہے

جیتے جی دکھ سکھ کے لمحے آتے جاتے رہتے ہیں

جیتے جی دکھ سکھ کے لمحے آتے جاتے رہتے ہیں

ہم تو ذرا سی بات پہ پہروں اشک بہاتے رہتے ہیں

وہ اپنے ماتھے پر جھوٹے روگ سجا کر پھرتے ہیں

ہم اپنی آنکھوں کے جلتے زخم چھپاتے رہتے ہیں

سوچ سے پیکر کیسے ترشے، سوچ کا انت نرالا ہے

خاک پہ بیٹھے آڑے تِرچھے نقش بناتے رہتے ہیں

دنیا بھی پیش آئی بہت بے رخی کے ساتھ

دنیا بھی پیش آئی بہت بے رخی کے ساتھ

ہم نے بھی زخم کھائے بڑی سادگی کے ساتھ

اک مشتِ خاک، آگ کا دریا، لہو کی لہر

کیا کیا روائتیں ہیں یہاں آدمی کے ساتھ

اپنوں کی چاہتوں نے بھی کیا کیا دیئے فریب

روتے رہے لپٹ کہ ہر اک اجنبی کے ساتھ

دل وہ پیاسا ہے کہ دریا کا تماشا دیکھے

دل وہ پیاسا ہے کہ دریا کا تماشا دیکھے

اور پھر لہر نہ دیکھے، کفِ دریا دیکھے

میں ہر اک حال میں تھا گردشِ دوراں کا امیں

جس نے دنیا نہیں دیکھی، مِرا چہرا دیکھے

اب بھی آتی ہے تِری یاد، پہ اس کرب کے ساتھ

ٹوٹتی نیند میں جیسے کوئی سپنا دیکھے

جو سنگ ہو کے ملائم ہے سادگی کی طرح

جو سنگ ہو کے ملائم ہے سادگی کی طرح

پگھل رہا ہے مِرے دل میں چاندنی کی طرح

مجھے پکارو تو دیوار ہوں، سنو تو صدا

میں گونجتا ہوں فضاؤں میں خامشی کی طرح

میں اس کو نور کا پیکر کہوں کہ جانِ خیال

جو میرے دل پہ اترتا ہے شاعری کی طرح

چاندنی کے ہاتھ بھی جب ہو گئے شل رات کو

چاندنی کے ہاتھ بھی جب ہو گئے شل رات کو

اپنے سینے پر سنبھالا میں نے بوجھل رات کو

رات بھر چھایا رہا گھر کی فضا پر اک ہراس

دستکیں دیتا تھا در پر کوئی پاگل رات کو

چاندنی میں گھُل گیا جب دل کی مایوسی کا زہر

میں نے خود کفنا دیا سایوں میں کومل رات کو

اشک جب دیدہ تر سے نکلا

اشک جب دیدۂ تر سے نکلا

ایک کانٹا سا جگر سے نکلا

پھر نہ میں رات گئے تک لوٹا

ڈوبتی شام جو گھر سے نکلا

ایک میت کی طرح لگتا تھا

چاند جب قیدِ سحر سے نکلا

وہ خود تو مر ہی گیا تھا مجھے بھی مار گیا

وہ خود تو مر ہی گیا تھا مجھے بھی مار گیا

وہ اپنے روگ مِری روح میں اتار گیا

سمندروں کی یہ شورش اسی کا ماتم ہے

جو خود تو ڈوب گیا، موج کو ابھار گیا

ہوا کی زخم کھلے تھے اداس چہرے پر

خزاں کے شہر سے کوئی تو پُر بہار گیا

وہ میرے سامنے منظر اچھال دیتا ہے

 وہ میرے سامنے منظر اچھال دیتا ہے
 نظر اٹھاؤں، تو آنکھیں نکال دیتا ہے
 سرشت اسکی خنک چاندنی سہی، لیکن
 وہ چاند، سارا سمندر ابال دیتا ہے
 وہ میری آخری ہچکی کا منتظر ہے بہت
 میرا سِسکنا اسے اشتعال دیتا ہے