رنگ اردو دنیا بھر کے نامور کلاسیک اور نوجوان اردو شعراء کے شاہکار کلام پر مبنی بلاگ🌷Rung E Urdu a blog of worldsfamous poetry of past & present era
کوئی زاری سنی نہیں جاتی، کوئی جرم معاف نہیں ہوتا
اس دھرتی پر اس چھت کے تلے کوئی تیرے خلاف نہیں ہوتا
کبھی دمکیں سونے کے ذرے کبھی جھلکے مُرغابی کا لہو
کئی پیاسے کب سے کھڑے ہیں، مگر پانی شفاف نہیں ہوتا
کوئی زُلف اُڑے تو بکھر جانا کوئی لب دہکیں تو ٹھٹھر جانا
کیا تزکیہ کرتے ہو دل کا،۔ یہ آئینہ صاف نہیں ہوتا
پڑے ہوئے ہیں مرے جسم و جاں مِرے پیچھے
ہے ایک لشکرِ غارت گراں مرے پیچھے
پسِ وفات یہ بے دستخط مِری تحریر
نہیں ہے اور کوئی بھی نشاں مرے پیچھے
مِرے ملازم و خرگاہ اسپ اور شطرنج
سب آئیں نظم سے ماتم کناں مرے پیچھے
اسے چاہیں تو آہیں
دل کی سب راہیں دھوئیں سے تیرہ و تاریک کر ڈالیں
نگاہیں یوں کراہیں
جیسے تا حد نظر اس کی شعاعیں مرگ آسا جال پھیلا دیں
ہر اک شب سانس کے تاروں کو الجھائے
سحر دم خواب گہ پر کسمپرسی سایہ سایہ اس طرح منڈلائے
قرطاس و قلم ہاتھ میں ہے اور شبِ مہ ہے
اے رب ازل! کھول دے جو دل میں گرہ ہے
اطراف سے ہر شب سمٹ آتی ہے سفیدی
ہر صبح جبیں پر مگر اک روزِ سیہ ہے
میں شام سے پہلے ہی پہنچ جاؤں تو بہتر
جنگل میں ہوں اور سر پہ مرے بارِ گنہ ہے
سنہری نیند سے کس نے مجھے بیدار کر ڈالا
دریچہ کھل رہا تھا خواب میں دیوار کر ڈالا
نشاں ہونٹوں کا لو دینے لگا ہے ذہن میں اب تو
بالآخر میں نے اس کو مشعل رخسار کر ڈالا
نقاہت اور بلا کا حسن اور آنکھوں کی دل گیری
عجب بیمار تھا جس نے مجھے بیمار کر ڈالا
