اس جہاں میں پیار مہکے زندگی باقی رہے

 اس جہاں میں پیار مہکے زندگی باقی رہے

یہ دعا مانگو دلوں میں روشنی باقی رہے

آدمی پورا ہوا تو دیوتا ہو جائے گا

یہ ضروری ہے کہ اس میں کچھ کمی باقی رہے

دوستوں سے دل کا رشتہ کاش ہو کچھ اس طرح

دشمنی کے سائے میں بھی دوستی باقی رہے

کچھ یوں سفر کے شوق نے منظر دکھائے ہیں

 کچھ یوں سفر کے شوق نے منظر دکھائے ہیں

منزل کے پاس آ کے قدم لڑکھڑائے ہیں

دنیا کے دکھ تمہارے ستم دوستوں کے غم

کس کس کو ہم بتائیں کہ کس کے ستائے ہیں

آئے ہیں عشق میں کبھی ایسے مقام بھی

آنکھیں تھیں اشکبار تو لب مسکرائے ہیں

جب بھی چلی ہے تیری بات

 جب بھی چلی ہے تیری بات

ہونٹوں پر مچلے نغمات

چاند کھلے جب راتوں میں

آئے یادوں کی بارات

مانا تیرا ساتھ نہیں

لیکن غم ہے اپنے ساتھ

اداسی کے منظر مکانوں میں ہیں

 اُداسی کے منظر مکانوں میں ہیں

اندھیرے ابھی آشیانوں میں ہیں

محبت کو موسم نے آواز دی

دلوں کی پتنگیں اُڑانوں میں ہیں

زباں والے بھی کاش سمجھیں کبھی

وہ دُکھ درد جو بے زبانوں میں ہیں

کیا چاہا تھا کیا سوچا تھا کیا گزری کیا بات ہوئی

 کیا چاہا تھا کیا سوچا تھا کیا گُزری کیا بات ہوئی

دل بھی ٹُوٹا گھر بھی چُھوٹا رُسوائی بھی ساتھ ہوئی

وہ کیا جانے اس سے بچھڑ کے ہم پر کیا کیا گُزری ہے

صحرا جیسا دن کا عالم،۔ پربت جیسی رات ہوئی

اس کے خط کو کیسے پڑھوں میں سارے لفظ تو بھیگے ہیں

میری چھت پر بادل چھائے، اس کے گھر برسات ہوئی

عشق کے رستے چلتے چلتے ہم ایسے مجبور ہوئے

 عشق کے رستے چلتے چلتے ہم ایسے مجبور ہوئے

ایک ذرا سی ٹھیس لگی تو دل کے شیشے چور ہوئے

پیار میں لاکھوں دل ٹُوٹے اور بنے ہزاروں افسانے

جن میں دل کا درد تھا شامل وہ قصے مشہور ہوئے

سچے لوگوں کو یہ دنیا جینے ہی کب دیتی ہے

ان سے پوچھو جو یہ جیون جینے پر مجبور ہوئے