کہا خوش بخت ہوں میں کہ مرے جیون میں تم ہو نا

 تم ہو نا

کہا، خوش بخت ہوں میں کہ مِرے جیون میں تم ہو نا

مِری آنکھوں، مِری سانسوں، مِری دھڑکن میں تم ہو نا

کہا، جگ سے نہیں مجھ کو ذرا رغبت کہ تم ہو نا

مِری دولت، مِری قسمت، مِری چاہت کہ تم ہو نا

تھکا مجھ کو نہیں سکتا کوئی بھی غم کہ تم ہو نا

مِری پلکیں کبھی ہوں گی نہیں پُرنم کہ تم ہو نا

اپنے دل کی ایک اک حسرت کو گروی رکھ دیا

 اپنے دل کی ایک اک حسرت کو گِروی رکھ دیا

جب محبت کی تو ہر راحت کو گروی رکھ دیا

آدمی کے نام پر دھبہ ہے وہ، جس نے یہاں

خوف کھا کر کُفر سے مِلت کو گروی رکھ دیا

اپنی خواہش کا جہنم بھرتے بھرتے دوستو

ہم نے تو اسلاف کی جنت کو گروی رکھ دیا

ان کہی کچھ حسرتوں کے باب لکھتے رہ گئے

 ان کہی کچھ حسرتوں کے باب لکھتے رہ گئے

زندگی! تیری اُجڑتی مانگ بھرتے رہ گئے

وقت کے گرداب نے کچھ یوں مجھے بھٹکا دیا

میں نکل آیا ہوں آگے، خواب پیچھے رہ گئے

اس نے دنیاوی خوشی سے دل کا دامن بھر لیا

میرے ہاتھوں پر دھرے وعدے ادھورے رہ گئے

بہت خاموش رہ کر جو صدائیں مجھ کو دیتا تھا

 بہت خاموش رہ کر جو صدائیں مجھ کو دیتا تھا

بڑے سُندر سے جذبوں کی قبائیں مجھ کو دیتا تھا

کبھی جو درد کی آتش مجھے سُلگانے لگتی تھی

وہ اپنے سانس کی مہکی ہوائیں مجھ کو دیتا تھا

وہ اس کی چاہتیں بھی تو زمانے سے انوکھی تھیں

ریاضت خود وہ کرتا تھا، جزائیں مجھ کو دیتا تھا

جسم نہیں وہ روح کو گھیرے ہوتے ہیں

 جسم نہیں وہ روح کو گھیرے ہوتے ہیں

کچھ نادیدہ ایسے پنجرے ہوتے ہیں 

بینائی کی اس میں کوئی شرط نہیں

اندھی آنکھوں میں بھی سپنے ہوتے ہیں

بک جاتے ہیں بس دو میٹھے بولوں میں

سادہ دل بھی کتنے سستے ہوتے ہیں