مجھے شوق دید میں پا کے گم وہ نقاب الٹ کے جو آ گئے

 مجھے شوقِ دید میں پا کے گم وہ نقاب الٹ کے جو آ گئے

نظر اور کچھ بھی نہ آ سکا وہ میری نظر میں سما گئے

کہاں اپنی ایسی تلاش تھی کہاں اپنی تھی ایسی جستجو

یہ تیرے کرم ہی کی بات ہے تیری بارگاہ میں آ گئے

مجھے تیر آراہوں کا غم نہیں میں گزر ہی جاؤں گا ہم نشیں

وہ دکھا کے مجھ کو رخِ مبیں میرے دل کی شمع جلا گئے

تمہارے آستاں سے جس کو نسبت ہوتی جاتی ہے

 تمہارے آستاں سے جس کو نسبت ہوتی جاتی ہے 

اسے حاصل زمانے بھر کی رفعت ہوتی جاتی ہے

کچھ اس انداز سے ان کی عنایت ہوتی جاتی ہے 

تماشہ گاہ عالم میری صورت ہوتی جاتی ہے 

تمہارے حسن کے جلوے نگاہوں میں سمائے ہیں 

ہماری زندگی تصویر حیرت ہوتی جاتی ہے 

وہ بھی وقت آیا تھا جب وہ زیب فراز بام ہوئے

 وہ بھی وقت آیا تھا جب وہ زیبِ فراز بام ہوئے 

لیکن تاب دید کسے تھی اہلِ نظر ناکام ہوئے 

رفتہ رفتہ جوش جنون عشق ہمیں راس آ ہی گیا 

ہر لمحہ تسکین دل کو ان کے جلوے عام ہوئے 

ان کا کیف ہے ان کی مستی ان کی ہستی رشکِ جہاں 

ساقی کی آنکھوں سے میسر جن رِندوں کو جام ہوئے 

کوئی ہستی یہاں میری شریک غم نہیں ہوتی

 کوئی ہستی یہاں میری شریکِ غم نہیں ہوتی

وہ ایک تیری نظر ہے جو کبھی برہم نہیں ہوتی

نہیں آتی کسی کو موت دنیائے محبت میں

چراغِ زندگی کی لو یہاں مدھم نہیں ہوتی

امیدیں ٹوٹ جاتی ہیں سہارے چھوٹ جاتے ہیں

مگر تیری محبت کی تمنا کم نہیں ہوتی

تمہارے آستاں کا جو کوئی دیوانہ کہلائے

 تمہارے آستاں کا جو کوئی دیوانہ کہلائے 

تم ہی کہہ دو وہ دنیا کیلئے کیوں ٹھوکریں کھائے 

زمانے سے ہمیں کیا ہے، ہمارا مدعا تم ہو 

بدلنا چاہتا ہے یہ زمانہ تو بدل جائے 

ابھی تو ہم زمانے کی نظر میں کچھ نہیں لیکن 

یہ ممکن ہے ہمارے بعد دنیا ہوش میں آئے 

تیری آنکھوں سے پینے کی جسے بھی آرزو ہو گی

 تیری آنکھوں سے پینے کی جسے بھی آرزو ہو گی

میرے ساقی اسے کیا حسرت جام و سبو ہو گی

تیری ہستی اگر خود بزم میں اے شمع رو ہو گی

ہر اک دل کو فدا ہونے کی تجھ پہ آرزو ہو گی

تصور میں وہ آئیں گے تو پوری آرزو ہو گی

وہ میرے پاس ہوں گے اور ان سے گفتگو ہو گی