کٹیا میں کون آئے گا اس تیرگی کے ساتھ

کٹیا میں کون آئے گا اس تیرگی کے ساتھ

اب یہ کواڑ بند کرو خامشی کے ساتھ

سایہ ہے کم کھجور کے اونچے درخت کا

امید باندھئے نہ بڑے آدمی کے ساتھ

چلتے ہیں بچ کے شیخ و برہمن کے سائے سے

اپنا یہی عمل ہے برے آدمی کے ساتھ

تجھے کون جانتا تھا مری دوستی سے پہلے

تجھے کون جانتا تھا،۔ مِری دوستی سے پہلے

تیرا حسن کچھ نہیں تھا مِری شاعری سے پہلے

ادھر آ رقیب میرے! میں تجھے گلے لگا لوں

مِرا عشق بے مزا تھا تِری دشمنی سے پہلے

کئی انقلاب آئے، کئی خوش خراب گزرے

نہ اٹھی مگر قیامت، تِری کم سِنی سے پہلے

یہ داڑھیاں یہ تلک دھاریاں نہیں چلتیں

یہ داڑھیاں یہ تلک دھاریاں نہیں چلتیں

ہمارے عہد میں مکاریاں نہیں چلتیں

قبیلے والوں کے دل جوڑیئے مِرے سردار

سروں کو کاٹ کے سرداریاں نہیں چلتیں

برا نہ مان،۔ اگر یار کچھ برا کہہ دے

دلوں کے کھیل میں خودداریاں نہیں چلتیں

تن تنہا مقابل ہو رہا ہوں میں ہزاروں سے

تنِ تنہا مقابل ہو رہا ہوں میں ہزاروں سے

حسینوں سے رقیبوں سے غموں سے غمگساروں سے

انہیں میں چھین کر لایا ہوں کتنے دعویداروں سے

شفق سے چاندنی راتوں سے پھولوں سے ستاروں سے

سنے کوئی، تو اب بھی روشنی آواز دیتی ہے

پہاڑوں سے گپھاؤں سے بیابانوں سے غاروں سے

اس طرح محبت میں دل پہ حکمرانی ہے

اس طرح محبت میں دل پہ حکمرانی ہے

دل نہیں میرا گویا ان کی راجدھانی ہے

گھاس کے گھروندے سے زور آزمائی کیا

آندھیاں بھی پگلی ہیں، برق بھی دیوانی ہے

شاید انکے دامن نے پونچھ دیں مِری آنکھیں

آج میرے اشکوں کا رنگ زعفرانی ہے

در و دیوار پہ شکلیں سی بنانے آئی

در و دیوار پہ شکلیں سی بنانے آئی

پھر یہ بارش مِری تنہائی چرانے آئی

زندگی باپ کی مانند سجا دیتی ہے

رحمدل ماں کی طرح موت بچانے آئی

آج کل پھر دلِ برباد کی باتیں ہیں وہی

ہم تو سمجھے تھے کہ کچھ عقل ٹھکانے آئی

چلو دلدار چلو چاند کے پار چلو

فلمی  گیت

چلو دلدار چلو چاند کے پار چلو 

ہم ہیں تیار چلو

چلو دلدار چلو چاند کے پار چلو 

ہم ہیں تیار چلو

آؤ کھو جائیں ستاروں میں کہیں

چھوڑ دیں آج یہ دنیا یہ زمیں

یہ مزاج یار کو کیا ہوا انہیں مجھ سے پیار ہے آج کل

یہ مزاج یار کو کیا ہوا انہیں مجھ سے پیار ہے آج کل

میری جستجو میری گفتگو میرا انتظار ہے آج کل

تیرے خطوط نکالنا، کبھی دیکھنا، کبھی چومنا

یہی مشغلہ، یہی سلسلہ، یہی کاروبار ہے آج کل

نہ اکیلا گھر سے نکل میاں ذرا دیکھ بھال کے چل میاں

بڑی ابتری، بڑی رہزنی، بڑی لوٹ مار ہے آج کل

تھوڑا سا عکس چاند کے پیکر میں ڈال دے

تھوڑا سا عکس چاند کے پیکر میں ڈال دے

تُو آ کے جان رات کے منظر میں ڈال دے

جس دن مِری جبیں کسی دہلیز پر جھکے

اس دن خدا شگاف مِرے سر میں ڈال دے

اللہ، تیرے ساتھ ہے، ملاح کو نہ دیکھ

یہ ٹوٹی پھوٹی ناؤ سمندر میں ڈال دے

بیمار محبت کی دوا ہے کہ نہیں ہے

بیمار محبت کی دوا ہے کہ نہیں ہے

میرے کسی پہلو میں قضا ہے کہ نہیں ہے

سنتا ہوں اک آہٹ سی برابر شبِ وعدہ

جانے تِرے قدموں کی صدا ہے کہ نہیں ہے

سچ ہے کہ محبت میں ہمیں موت نے مارا

کچھ اس میں تمہاری بھی خطا ہے کہ نہیں ہے

داغ دنیا نے دئیے زخم زمانے سے ملے

داغ دنیا نے دئیے زخم زمانے سے ملے

ہم کو تحفے یہ تمہیں دوست بنانے سے ملے

ہم ترستے ہی ترستے ہی ترستے ہی رہے

وہ فلانے سے فلانے سے فلانے سے ملے

خود سے مل جاتے تو چاہت کا بھرم رہ جاتا

کیا ملے آپ جو لوگوں کے ملانے سے ملے

آج ہم اپنی دعاؤں کا اثر دیکھیں گے

آج ہم اپنی دعاؤں کا اثر دیکھیں گے 

تیرِ نظر دیکھیں گے زخمِ جگر دیکھیں گے

آپ تو آنکھ ملاتے ہوئے شرماتے ہیں
آپ تو دل کے دھڑکنے سے بھی ڈر جاتے ہیں
پھر بھی یہ ضد ہے کہ زخمِ جگر دیکھیں گے
پیار کرنا دلِ بے تاب! بُرا ہوتا ہے
سنتے آئے ہیں کہ یہ خواب بُرا ہوتا ہے

صرف اتنے جرم پر ہنگامہ ہوتا جائے ہے

صرف اتنے جرم پر ہنگامہ ہوتا جائے ہے 

تیرا دیوانہ تِری گلیوں میں دیکھا جائے ہے 
آپ کس کس کو بھلا سُولی چڑھاتے جائیں گے
اب تو سارا شہر ہی "منصور" بنتا جائے ہے
دلبروں کے بھیس میں پھرتے ہیں چوروں کے گروہ
جاگتے رہیو، کہ ان راتوں میں لُوٹا جائے ہے 

ہم کو دیوانہ جان کے کیا کیا ظلم نہ ڈھایا لوگوں نے

ہم کو دِوانہ جان کے کیا کیا ظلم نہ ڈھایا لوگوں نے
دِین چھڑایا، دھرم چھڑایا، دیس چھڑایا، لوگوں نے 
تیری گلی میں آ نکلے تھے، دوش ہمارا اتنا تھا
پتھر مارے، تہمت باندھی، عیب لگایا، لوگوں نے 
تیری لٹوں میں سو لیتے تھے بے گھر عاشق بے گھر لوگ
بوڑھے برگد! آج تجھے بھی کاٹ گرایا لوگوں نے 

جسم پر باقی یہ سر ہے کیا کروں

جسم پر باقی یہ سر ہے، کیا کروں
دستِ قاتل بے ہنر ہے، کیا کروں 
چاہتا ہوں، پھونک دوں اس شہر کو
شہر میں ان کا بھی گھر ہے، کیا کروں 
وہ تو سو سو مرتبہ چاہیں مجھے
میری چاہت میں کسر ہے، کیا کروں