آج قسمت آزمائی ہو گئی

 آج قسمت آزمائی ہو گئی

کُوئے جاناں میں رسائی ہو گئی

وہ نہ مِلتے تو نہ تھا کوئی گِلہ

غم یہ ہے مِل کر جُدائی ہو گئی

آشنائی سے ہے جو ناآشنا

اس سے اپنی آشنائی ہو گئی

کیا نگاہِ ناز بھی شمشِیر تھی

جس طرف دیکھا صفائی ہو گئی

وہ تو شوشہ چھوڑ کر چلتے بنے

غیر سے میری لڑائی ہو گئی

اُس بتِ کافر کا جوبن دیکھ کر

ختم ساری پارسائی ہو گئی

پھر نہ لیں گے نام اُلفت کا کبھی

اب کے گر غم سے رِہائی ہو گئی

وہ بِگڑ اُٹھے سوالِ وصل پر

باتوں باتوں میں لڑائی ہو گئی

عشق میں دیکھا رقابت کا مزا

دُشمنِ جاں اِک خُدائی ہو گئی

مِٹ گیا ہاجر طبیعت کا غُبار

شُکر ہے اُن سے صفائی ہو گئی

ہاجر دہلوی