کسی انسان کو اپنا نہیں رہنے دیتے

کسی انسان کو اپنا نہیں رہنے دیتے

شہر ایسے ہیں کہ تنہا نہیں رہنے دیتے

ان سے بچنا، کہ بچھاتے ہیں پناہیں پہلے

پھر یہی لوگ کہیں کا نہیں رہنے دیتے

پہلے دیتے ہیں دلاسہ کہ بہت کچھ ہے یہاں

اور پھر ہاتھ میں کاسہ نہیں رہنے دیتے

برائے نام سہی سائباں ضروری ہے

برائے نام سہی، سائباں ضروری ہے

زمین کے لیے اک آسماں ضروری ہے

تعجب ان کو ہے کیوں میری خود کلامی پر

ہر آدمی کا کوئی راز داں ضروری ہے

ضرورت اس کی ہمیں ہے مگر یہ دھیان رہے

کہاں وہ غیر ضروری، کہاں ضروری ہے

الگ ہیں ہم کہ جدا اپنی رہگزر میں ہیں

الگ ہیں ہم کہ جدا اپنی رہگزر میں ہیں

وگرنہ لوگ تو سارے اسی سفر میں ہیں

ہماری جست نے معزول کر دیا ہم کو

ہم اپنی وسعتوں میں اپنے بام و در میں ہیں

یہاں سے ان کے گزرنے کا ایک موسم ہے

یہ لوگ رہتے مگر کون سے نگر میں ہیں

ازل سے لوگ خدا کو خدا نہیں کہتے

نہ جانے کیوں سدا ہوتا ہے ایک سا انجام

ہم ایک سی تو کہانی سدا نہیں کہتے

جدھر پہنچنا ہے آغاز بھی وہیں سے ہوا

سفر سمجھتے ہیں اس کو سزا نہیں کہتے

نیا شعور نئے استعارے لاتا ہے

ازل سے لوگ خدا کو خدا نہیں کہتے

جب خاک سے خیال نمودار ہو گیا

پھر اس کے بعد راستہ ہموار ہو گیا

جب خاک سے خیال نمودار ہو گیا

اک داستان گو ہوا ایسا کہ اپنے بعد

ساری کہانیوں کا وہ کردار ہو گیا

سایہ نہ دے سکا جسے دیوار کا وجود

اس کا وجود نقش بہ دیوار ہو گیا

جس کو طے کر نہ سکے آدمی صحرا ہے وہی

جس کو طے کر نہ سکے آدمی صحرا ہے وہی

اور آخر مِرے رستے میں بھی آیا ہے وہی

یہ الگ بات کہ ہم رات کو ہی دیکھ سکیں

ورنہ دن کو بھی ستاروں کا تماشا ہے وہی

اپنے موسم میں پسند آیا ہے کوئی چہرہ

ورنہ موسم تو بدلتے رہے چہرہ ہے وہی

وہ لوگ کون سے سورج سے جل رہے ہوں گے

نکل گئے ہیں جو صحرا میں اپنے اتنی دور

وہ لوگ کون سے سورج سے جل رہے ہوں گے

عدم کی نیند میں سوئے ہوئے کہاں ہیں وہ اب

جو کل وجود کی آنکھوں کو مل رہے ہوں گے

ملے نہ ہم کو جواب اپنے جن سوالوں کے

کسی زمانے میں ان کے بھی حل رہے ہوں گے

خود سے نکلوں تو الگ ایک سماں ہوتا ہے

خود سے نکلوں تو الگ ایک سماں ہوتا ہے
اور گہرائی میں اتروں تو دھواں ہوتا ہے
اتنی پیچیدگی نکلی ہے یہاں ہونے میں
اب کوئی چیز نہ ہونے کا گماں ہوتا ہے
سب سوالوں کے جواب ایک سے ہو سکتے ہیں
ہو تو سکتے ہیں، مگر ایسا کہاں ہوتا ہے؟

کیسے جانوں کہ جہاں خواب نما ہوتا ہے

کیسے جانوں کہ جہاں خواب نما ہوتا ہے

جبکہ ہر شخص یہاں آبلہ پا ہوتا ہے

دیکھنے والوں کی آنکھوں میں نمی تیرتی ہے

سوچنے والوں کے سینے میں خلا ہوتا ہے

لوگ اس شہر کو خوشحال سمجھ لیتے ہیں

رات کے وقت بھی جو جاگ رہا ہوتا ہے

فقط زمین سے رشتے کو استوار کیا

فقط زمین سے رشتے کو استوار کیا

پھر اس کے بعد سفر سب ستارہ وار کیا

بس اتنی دیر میں اعداد ہو گئے تبدیل

کہ جتنی دیر میں ہم نے انہیں شمار کیا

کبھی کبھی لگی ایسی زمین کی حالت

کہ جیسے اس کو زمانے نے سنگسار کیا