کہا تھا اس نے محبت کی آبرو رکھنا

کہا تھا اس نے محبت کی آبرو رکھنا

چبھے ہوں کتنے ہی کانٹے گلوں کی خو رکھنا

دلوں کو توڑ نہ ڈالے تمہاری حق گوئی

بجائے حرف کے آئینہ روبرو رکھنا

جو وقت اہلِ وفا سے کبھی لہو مانگے

تو سب سے پہلے لبِ تیغ پر گلو رکھنا

نام اکبر تو مرا ماں کی دعا نے رکھا

نام اکبر تو مِرا ماں کی دعا نے رکھا

ہاں بھرم اس کا مگر خدا نے رکھا

وہ بھی دن تھے کہ تِرے آنے کا پیغام آیا

تب مرے گھر میں قدم بادِ صبا نے رکھا

کس طرح لوگوں نے مانگیں تھیں دعائیں اس کی

کچھ لحاظ اس کا نہ بے مہر ہوا نے رکھا

کس کے قلم سے بھاگ ہمارے لکھے گئے

کس کے قلم سے بھاگ ہمارے لکھے گئے

آنسو نہ لکھ سکے تو ستارے لکھے گئے

اظہار کی مروتیں تھیں اور کچھ نہ تھا

طوفان کی بجائے کنارے لکھے گئے

وہ جو ہماری جان کے دشمن بنے رہے

ہم ان کو اپنی جان سے پیارے لکھے گئے

کچھ زمیں پر رہ گیا کچھ آسماں میں رہ گیا

کچھ زمیں پر رہ گیا کچھ آسماں میں رہ گیا

اک ضروری کام تھا جو درمیاں میں رہ گیا

چاہتیں دونوں طرف تھیں پر نہ مل پائے کہیں

میں مکاں میں وہ غرورِ لا مکاں میں رہ گیا

دل میں کیا کچھ تھا مگر کچھ بھی نہ کہہ پائے انہیں

حرفِ مطلب جو بھی تھا حُسنِ بیاں میں رہ گیا

سچ پہ اصرار بھی ضروری ہے

سچ پہ اصرار بھی ضروری ہے

حسنِ اظہار بھی ضروری ہے

یونہی بدنامیاں نہیں ملتیں

اچھا کردار بھی ضروری ہے

وحشتیں ایسے ہی نہیں ہوتیں

رہ میں دیوار بھی ضروری ہے

غم زمانہ کریں ترک خوش خیالی کریں

غمِ زمانہ کریں ترک، خوش خیالی کریں

جہاں تلک ہو مزاجوں کو لا ابالی کریں

بہت سے اور عوامل بھی اس میں شامل ہیں

ہر ایک بات پہ کیوں اپنی گوشمالی کریں

اجاڑنی نہیں دل کی ہری بھری فصلیں

خود اپنے ہاتھوں سے مت اپنی پائمالی کریں

گماں یک طرفہ ہے سفر ہے یک طرفہ

گماں یک طرفہ ہے سفر ہے یک طرفہ

ہماری عمر میں سارا سفر ہے یک طرفہ

جو اس گلی میں گیا،۔۔ لوٹ کر نہیں آیا

کہ اس گلی کی ہر اک رہگزر ہے یک طرفہ

یہ زندگی ہے جو سمجھوتہ کر سکو اس سے

تمہارے حق میں ہے پھر بھی، اگر ہے یک طرفہ

یہ میں کس شہر کے نواح میں ہوں

یہ میں کس شہر کے نواح میں ہوں

روز و شب جیسے قتل گاہ میں ہوں

وقت نے جیسے نظریں پھیری ہیں

اور میں کوششِ نِباہ میں ہوں

راستے بند ہوتے جاتے ہیں

اور میں منزلوں کی چاہ میں ہوں

گھن گھور اندھیروں میں ستارا چمکے

گھن گھور اندھیروں میں ستارا چمکے

جیسے طوفاں میں کنارا چمکے

وہی بحران ہے اب بھی لیکن

تیری آنکھوں میں اشارا چمکے

وقت بن جاتا ہے مرہم خود ہی

اشک مانندِ غبارا چمکے

اس کو نظر میں بھر رکھا ہے

اس کو نظر میں بھر رکھا ہے

آدھا کام تو کر رکھا ہے

اس نے کہا تھا مت گھبرانا

ہر دیوار میں در رکھا ہے

کچھ تو اس کے معنی ہونگے

ہر شانے پر سر رکھا ہے

جو بھی حالات ہوں پیچھے نہیں ہٹنے والے

جو بھی حالات ہوں پیچھے نہیں ہٹنے والے

ہم ہیں عشاق تیری آن پہ کٹنے والے

چڑھتے سورج کو بھلا روک سکا ہے کوئی

کون کہتا ہے یہ بادل نہیں چھَٹنے والے

ہم وہ خورشیدِ جہاں تاب ہیں چمکے جو سدا

ہم کوئی چاند نہیں ہیں، جو ہوں گھٹنے والے