غیر بھی بے دم ہیں نالوں سے بت بے پیر بھی

 غیر بھی بیدم ہیں نالوں سے بُتِ بے پِیر بھی

اک ہوائی تِیر ہے یہ آہِ بے تاثیر بھی

کوئی شے خالی نہیں نیرنگِ حُسنِ یار سے

گُل میں رنگ و بُو تو مہر و مہ میں ہے تنویر بھی

کہتے ہیں رکھتے نہیں کیوں مُوئے مِژگاں کا خیال

کیا تمہارے دل میں رہ سکتا نہیں اک تِیر بھی

اس قدر ضُعفِ غمِ ہِجراں سے ہمّت گھٹ گئی

بڑھ کے زِنداں سے نہ نِکلا نالہٴ زنجیر بھی

قید کی تکلیف سے دونوں کو چھٹکارا ہُوا

میرے مرنے سے کُھلی ہے قسمتِ زنجیر بھی

وقتِ نظارہ نہیں جمتی کبھی اس پر نگاہ

جوہرِ آئینہ ہے ظالم تِری تصویر بھی

رحمتِ خالق بھی ہے آزاد اک سُو حشر میں

سر جُھکائے اک طرف نادِم میری تقصیر بھی

ابوالکلام آزاد