کیا حسن تعاقب ہے کہ جب تو نکل آئے

 کیا حُسنِ تعاقب ہے کہ جب تُو نکل آئے

تارے سے کرن، پھول سے خوشبو نکل آئے

کس طرح تِری آنکھ کو تمثیل میں لاؤں

اس سوچ میں بیٹھا تھا کہ آہو نکل آئے

ہے پھولوں کا موسم کہ تِری جنبشِ لب ہے

افشاں ہے سرِ زُلف کہ جگنو نکل آئے

اگر وہ پرسش احوال کو آنے لگ جائیں

 اگر وہ پُرسشِ احوال کو آنے لگ جائیں

بے بسی ہم تِرا تہوار منانے لگ جائیں

لوگ اک پل میں وہ تعمیر گرا دیتے ہیں

جس کی بنیاد اٹھانے میں زمانے لگ جائیں

تیرگی ایسی ہے شاخوں پہ گماں ہوتا ہے

خود پرندے ہی نشیمن نہ جلانے لگ جائیں

وہ منصب و مقام صدا کون لے گیا

 وہ منصب و مقامِ صدا کون لے گیا

میری صلیب، میری انا کون لے گیا

چہرے تو خیر عکس کے قابل نہیں رہے

لیکن یہ آئینوں سے جِلا کون لے گیا

فانوس جل رہے ہیں جہاں ان سے پوچھنا

وہ طاق میں چراغ مِرا کون لے گیا

شہر کا سارا درد بھی لکھنا

 شہر کا سارا درد بھی لکھنا

چہرہ چہرہ زرد بھی لکھنا

ویراں ویراں ساری آنکھیں

دامن دامن گرد بھی لکھنا

آوازوں کی گرم رُتوں میں

اپنا لہجہ سرد بھی لکھنا

مجھ پر پڑی نگاہ تو اک شور مچ گیا

 مجھ پر پڑی نگاہ تو اک شور مچ گیا

یہ کون ہے جو گردشِ دوراں سے بچ گیا

کانٹوں نے اپنی خشک زبانیں نکال دیں

موسم کا سارا خون گلابوں میں رچ گیا

اک میں کہ میرے لب پہ تبسم بھی ناگوار

اک تُو کہ تیری آنکھ میں آنسو بھی جچ گیا

اس بے کفن ضمیر پہ شرمندہ کون ہے

 اس بے کفن ضمیر پہ شرمندہ کون ہے

میں سوچتا ہوں شہر میں اب زندہ کون ہے

اس بزمِ کم سواد میں منظر نگارِ زیست

اس وقت تک تو میں رہا، آئندہ کون ہے

کس کی صدا نے آگ کا جادو جگا دیا

نغمہ نواز کون، یہ سازندہ کون ہے

گزرا جو کربلا میں زمانہ نہ پوچھئے

عارفانہ کلام منقبت سلام مرثیہ

اربابِ زندگی کا ترانہ نہ پوچھئے

گزرا جو کربلا میں زمانہ نہ پوچھئے

وہ دور صبح، دورِ شبانہ نہ پوچھئے

کیسے لٹا نبیؐ کا گھرانہ نہ پوچھئے   

لمحوں کو راستوں میں سہارے نہیں ملے  

اس رات آسماں کو ستارے نہیں ملے

ترک الفت کی بات یاد نہیں

ترکِ الفت کی بات یاد نہیں

کب لُٹی کائنات، یاد نہیں

اس نے عہد وفا تو باندھا تھا

اور وہ کس کے ساتھ، یاد نہیں 

زلف برہم تھی رخ پہ وقتِ وداع

دن تھا اس دَم کہ رات، یاد نہیں 

فصل جنوں میں زنجیروں کا حلقہ دیکھنے والا تھا

فصلِ جنوں میں زنجیروں کا حلقہ دیکھنے والا تھا

دیوانے جب گرمِ سفر تھے صحرا دیکھنے والا تھا

وہ مٹی کا کچا گھڑا تھا، لے ڈوبا جو مانجھی کو

ورنہ دریا پار کا یارو! میلہ دیکھنے والا تھا

تُو کہ میری خاطر ایک ذرا سا موڑ نہ کاٹ سکا

میں تو روزِ ازل سے تیرا رستہ دیکھنے والا تھا

پچھلے پہر کا سناٹا جب زہر فضا میں گھولے گا

پچھلے پہر کا سناٹا جب زہر فضا میں گھولے گا

کون کسی سے بات کرےگا، کون کسی سے بولے گا

اک نووارد کی آہٹ، پھر من کے تار ہلائے گی

پسِ منظر میں ڈولتا سایہ، آج دریچہ کھولے گا

رات کے راہی کی پلکیں ہیں بھیگی بھیگی شبنم سے

اس حالت میں دن نکلا تو کرنوں کا دل ڈولے گا

لے کے پلکوں پہ ستاروں کے الم آتے ہیں

لے کے پلکوں پہ ستاروں کے الم آتے ہیں

آج کل جشن کی صورت تیرے غم آتے ہیں

رہ میں کس کی ملاقات کا سورج ابھرا

قافلے نغمہ بہ لب، ساز بہ دم آتے ہیں

میری آنکھوں میں تو پھیلا ہے بیاباں کا غبار

لوگ کیوں شہر سے بادیدۂ نم آتے ہیں

ایک پتہ سا جو خون میں تر لگتا ہے

ایک پتہ سا جو خون میں تر لگتا ہے

ڈار سے بچھڑی ہوئی کونج کا پر لگتا ہے

پھر ہوا جھومی ہے راہوں میں شجر جھومے ہیں

پھر مجھے آج وہ مصروفِ سفر لگتا ہے

میرے ہونٹوں پہ تبسم بھی گلہ ہو جیسے

آپ کی آنکھ میں آنسو بھی گہر لگتا ہے