کیا حسن تعاقب ہے کہ جب تو نکل آئے

 کیا حُسنِ تعاقب ہے کہ جب تُو نکل آئے

تارے سے کرن، پھول سے خوشبو نکل آئے

کس طرح تِری آنکھ کو تمثیل میں لاؤں

اس سوچ میں بیٹھا تھا کہ آہو نکل آئے

ہے پھولوں کا موسم کہ تِری جنبشِ لب ہے

افشاں ہے سرِ زُلف کہ جگنو نکل آئے

جب غور کیا میں نے تِری سطحِ جبیں پر

مضموں میں مِرے چاند کے پہلو نکل آئے

ہو سکتا ہے پھر خیمے جلیں، تیر بھی برسیں

پھر دشت سے ہم چل کے لبِ جُو نکل آئے

کچھ گردشِ دوراں کی حقیقت تو سمجھ لوں

ممکن ہے تِری آنکھ کا جادو نکل آئے

کس کربِ مسلسل کا وفا ہے یہ تاثر؟

جب ہنسنے لگا آنکھ سے آنسو نکل آئے

وفا حجازی