آئندہ پھر نہ آئے کبھی ہجرِ یار میں
جی چاہتا ہے آگ لگا دُوں بہار میں
آنے لگا وہ کیوں مِرے اُجڑے دیار میں
دن رات جس کی چين سے گُزرے بہار میں
وہ آئیں یا نہ آئیں یہ اُن کے کرم پہ ہے
ہم تو اُٹھا رہے ہیں مزے انتظار میں
سب کچھ بُھلا چُکا ہوں محبت میں آپ کی
اِک یاد رہ گئی ہے دلِ بے قرار میں
وہ تو ذرا سی دیر کو میّت پہ بھی نہ آئے
ہم جن کے آسرے پہ چلے تھے مزار میں
پردے میں چُھپ کے بیٹھنے والے اِدھر تو دیکھ
کیا کُچھ نہیں مِری نِگۂ اعتبار میں
اے کاش یاد آئیں تجھے بھی مِری طرح
وہ دن گُزر گئے جو محبت میں پیار میں
ایک ایک لمحہ یاد ہے ایک ایک وہ گھڑی
ہم کو تلاشِ یار تھی جب کُوئے یار میں
اے مستِ حُسنِ ناز کچھ اس کی بھی خبر ہے
جذبہ تھا کیا مِری نِگۂ بار بار میں
کیا جبر ہے کہ ہم پہ ہوں کیوں فریفتہ
کہہ تو دیا کہ دِل نہ رہا اختيار میں
کیا فائدہ نکال بھی دل سے کدُورتیں
دو دن کی زندگی ہے گُزر جائے پیار میں
افسوس تُو نے دل کی ذرا بھی نہ قدر کی
یہ داغ لے چلا ہوں دلِ داغدار میں
مُشتاق جن کی آنکھوں سے پردے اُٹھے اُنہیں
سو سو طرح کی دِید ہے اِک دِیدِ یار میں
سید غلام معین الدین مشتاق
No comments:
Post a Comment