اللہ نگہبان ترا اے دل بیتاب

 اللہ نگہبان تِرا، اے دلِ بے تاب

ٹوٹی ہوئی کشتی ہے، بپھرتے ہوئے گرداب

جو موجِ حوادث کے تھپیڑوں میں پلا ہو

موتی وہی ہوتا ہے جہاں میں دُرِ نایاب

پھر آج دعاؤں میں گھٹا مانگ رہا ہے

سُوکھے ہوئے تالاب میں بیٹھا ہوا سُرخاب

اے زورِ علیؑ، فقرِ ابو ذر سے برومند

بے زور تِرے سامنے ہر رستم و سہراب

تریاق کے کوزے میں بھرا زہرِ ہلاہل

الله رے! میخانۂ مغرب کی مئے ناب

دل توڑنے والے تجھے معلوم نہیں ہے

سُوکھی ہوئی آنکھوں سےابل پڑتے ہیں سیلاب

نغمات سے بے زار، مغنّی سے گریزاں

سازوں کو ترس جائیں نہ ٹوٹے ہوئے مِضراب

تُو اپنی حقیقت کا شناسا نہیں،۔ ورنہ

دریا تِرے دامن میں ہے اے ماہئ بے آب

بزمی یہ جفاؤں کے سُلگتے ہوئے صحرا

الله رکھے تجھ کو زمانے میں ظفریاب

سرفراز بزمی