تنکا تنکا آس بہر آشیاں چنتا رہا

تنکا تنکا آس بہرِ آشیاں چُنتا رہا

زندگی کی راکھ سے چنگاریاں چنتا رہا

یہ میری مثبت روی تھی یا میری مجبوریاں

خامیوں کے ڈھیر سے کچھ خوبیاں چنتا رہا

کس قدر مشروب تُو نے کر دیا عہدِ وفا

سرخیوں کو بھول کر باریکیاں چنتا رہا

موسمِ گل بارہا آیا مگر دیوانہ پن

گلشنِ امید سے مایوسیاں چنتا رہا

شاعرانہ ہی سہی، یہ ہیں تو بے پرواہیاں

ہوشمندوں کے لیے مدھوشیاں چنتا رہا

وقف کر دیں میں نے ساری نرمیاں تِرے لیے

اور خود اپنے لیے میں سختیاں چنتا رہا

دیر تک میں بھی قمر اس کے چلے جانے کے بعد

آہٹیں، سرگوشیاں اور سِسکیاں چنتا رہا

قمر زیدی