ہم تو بس اک عقدہ تھے حل ہونے تک

 ہم تو بس اک عقدہ تھے حل ہونے تک

زنجیروں میں بند تھے پاگل ہونے تک

عشق اگر ہے دین تو پھر ہو جائیں گے

ہم بھی مُرتد اس کے مکمل ہونے تک

میں پانی تھا سورج گھور رہا تھا مجھے 

کیا کرتا بے بس تھا بادل ہونے تک 

ہم تو اندر سے کوئی غار تھے اب گھر ہوئے ہیں

ہم تو اندر سے کوئی غار تھے اب گھر ہوئے ہیں

یعنی آباد اسے کر کے قلندر ہوئے ہیں

کیا ہوا ہاتھ اگر آپ کو ملنے سے رہے

جنگ میں آپ کے نیزے تو ثمرور ہوئے ہیں

ہم تو اک رنگ تھے دنیا نے اڑایا تھا جسے

اب تِری آنکھ کے اعجاز سے منظر ہوئے ہیں

میں ابھی اک بوند ہوں پہلے کرو دریا مجھے

میں ابھی اک بوند ہوں پہلے کرو دریا مجھے

پھر اگر چاہو کرو وابستۂ صحرا مجھے

پھیلتا ہی جاتا ہے اس میں خموشی کی طرح

قلزمِ آواز نے ہر سمت سے گھیرا مجھے

میرے ہونے یا نہ ہونے سے اسے مطلب نہ تھا

تیرے ہونے کا تماشا ہی لگی دنیا مجھے

دعا قبول ہوئی بادشہ سلامت کی

دعا قبول ہوئی بادشہ سلامت کی

عدو کی فوج کے سالار نے بغاوت کی

مِرے بدن پہ رواں دجلہ و فرات بھی تھے

مگر لبوں پہ مِرے پیاس تھی قیامت کی

تمام نخلِ ثمردار اکھڑ گئے جڑ سے

یہاں سے موسمِ راحت فزا نے ہجرت کی

اگر چٹان کی یہ چپ کلام ہے سائیں

اگر چٹان کی یہ چپ کلام ہے سائیں

تو پھر ہماری سماعت ہی خام ہے سائیں

تہی ہے زر سے مگر ہے خمار سے لبریز

فقیر کا یہی کشکول،۔ جام ہے سائیں

بجا کہ شہر میں ارزاں بہت ہیں خواب مگر 

یہاں تو نیند ہی ہم پر حرام ہے سائیں

عجیب خامشی ہے غل مچاتی رہتی ہے

عجیب خامشی ہے، غُل مچاتی رہتی ہے

یہ آسمان ہی سر پر اٹھاتی رہتی ہے

کِیا ہے عشق تو ثابت قدم بھی رہنا سیکھ

میاں! یہ ہجر کی آفت تو آتی رہتی ہے

ڈرو نہیں یہ کوئی سانپ زیرِ کاہ نہیں

ہوا ہے اور وہی سرسراتی رہتی ہے

ایک صراحی بولی قلقل اللہ ہو

ایک صراحی بولی قُل قُل، اللہ ہُو
پھر کیا تھا ہر سمت مچا غل اللہ ہو
میں وہ سوار کہ جس کی رہ میں غبار نہ گرد
میری سواری اسپِ تخیل، اللہ ہو
اپنے وجود میں جھانک کے میں تو ڈر ہی گیا
جز میں یقیناً رہتا ہے کل، اللہ ہو

تمہارے کانپتے ہاتھوں میں اک گلاس لکھوں

تمہارے کانپتے ہاتھوں میں اک گلاس لکھوں
اور اپنے تپتے لبوں پر شدید پیاس لکھوں
میں جانتا ہوں گھنی دھند میں ضروری ہے
کہ اپنی آنکھ کو منظر کے آس پاس لکھوں
قلم بھی سونے کا آیا ہے اب کے نذرانہ
وہ چاہتے ہیں کہ میں سنگ کو کپاس لکھوں

جسم دیوار ہے دیوار میں در کرنا ہے

جسم دیوار ہے، دیوار میں در کرنا ہے

روح اک غار ہے اس غار میں گھر کرنا ہے
ایک ہی قطرہ تو ہے اشکِ ندامت کا بہت
کون سے دشت و بیابان کو تر کرنا ہے
خاک ہو جانے پہ اے خاک بسر کیوں ہو بضد
کیا تمہیں دوشِ ہوا پر بھی سفر کرنا ہے

غضب کی کاٹ تھی اب کے ہوا کے طعنوں میں

غضب کی کاٹ تھی اب کے ہوا کے طعنوں میں
شگاف پڑ گئے ہیں بے زباں چٹانوں میں
یہ اور بات کہ پتھر کے ہونٹ ہیں ورنہ
ہم ایک آگ لیے پھرتے ہیں دہانوں میں
سیاہ شہر کی قسمت میں میرا فیض کہاں
چراغِ نذر ہوں، جلتا ہوں آستانوں میں

سدا بہار ہے کتنا یہ شاخسانۂ درد

سدا بہار ہے کتنا یہ شاخسانۂ درد
کہ بِیت کر بھی گزرتا نہیں زمانۂ درد
صدائے شورِ سگاں تک یہاں نہیں آتی
عجب سکوت سے معمور ہے یہ خانۂ درد
چراغِ منظرِ بے منظری اس آنکھ میں ہے
اسی کے دَم سے ہے روشن یہ آستانۂ درد