سدا بہار ہے کتنا یہ شاخسانۂ درد

سدا بہار ہے کتنا یہ شاخسانۂ درد
کہ بِیت کر بھی گزرتا نہیں زمانۂ درد
صدائے شورِ سگاں تک یہاں نہیں آتی
عجب سکوت سے معمور ہے یہ خانۂ درد
چراغِ منظرِ بے منظری اس آنکھ میں ہے
اسی کے دَم سے ہے روشن یہ آستانۂ درد
یہ لَو چراغ کی سر دُھن رہی ہے کیوں اپنا
ہَوا سُنا گئی اس کو بھی کیا ترانۂ درد
سرابِ چشم سے ٹپکے ہوئے زمانہ ہوا
کوئی ستارہ، کوئی گوہرِ یگانۂ درد
سمجھ رہا تھا جسے میں بس ایک خوابکدہ
وہ آنکھ تو مِری نکلی نگار خانۂ درد
سیاہ، جنبشِ پا سے بھی کر یہ صفحۂ دَشت
کہیں جہاں میں رقم بھی تو کر فسانۂ درد

رفیق راز