جبروت کی لے صبر کی گفتار سے کم ہے

جبرُوت کی لَے صبر کی گفتار سے کم ہے
شاہوں کا حشم چہرۂ بیمار سے کم ہے
ایماں کی طرف آنے سے حُر کے یہ کُھلا راز
عالم کی جبِیں قلبِ گنہ گار سے کم ہے
شبیرؓ تیری بات کی کوئی نہیں تمثیل
اثباتِ جہاں بھی تیرے انکار سے کم ہے
چُننے کو اسے آئی ہیں خود فاطمہؓ زہراؓ
آنکھوں کا لہو، اشکِ عزادار سے کم ہے
حج چھوڑنا شبیرؓ کا بتلائے گا تا حشر
کعبے کی اذاں جرأتِ اظہار سے کم ہے
یہ بات ہمیں کربلا والوں نے بتائی
دولت کی چمک عظمتِ کردار سے کم ہے
لگتا ہے مجھے یہ کسی ظالم کا مکاں ہے
سایہ بھی یہاں سایۂ دیوار سے کم ہے
نقاشؔ نئے دور کا احساس تو دیکھو
شاعر کا ہُنر جبہ و دستار سے کم ہے

وصی الحسن نقاش