خزاں نصیب میں رشتہ مگر بہار سے بھی

خزاں نصیب میں، رشتہ مگر بہار سے بھی

 مجھے تو گْل کی توقّع ہے نوکِ خار سے بھی

 مْصِر ہوں میں، کہ گِنا جاؤں باوقاروں میں

 اْنہیں یہ ضِد کہ میں خارج رہوں شُمار سے بھی

 جہاں بھی جاؤں، اسیرِ حیات رہتا ہوں

 یہ مسئلہ تو نہ حل ہو سکا فرار سے بھی

سحر کی کتنی دْعائیں خْدا سے مانگی ہیں

 اب التماس کروں گا جمالِ یار سے بھی

 عجیب حشرِ محبت کا سامنا ہے، کہ وہ

 خفا خفا ہے، مگر دیکھتا ہے پیار سے بھی

 میں مر بھی جاؤں تو تخلیق سے نہ باز آؤں

 بنیں گے نِت نئے خاکے مِرے غبار سے بھی

 ندیمؔ وقت کا مرہم نہ میرے کام آیا

 کہ زخمِ دل نہ بھرا طْولِ انتظار سے بھی

احمد ندیم قاسمی