لفظ لا کے لب اظہار پہ رکھ دیتے ہیں

لفظ لا کے لبِ اظہار پہ رکھ دیتے ہیں

ہم ہیں جو دائرہ پرکار پہ رکھ دیتے ہیں

مل ہی جائے گی اسے اپنی خبر رات گئے

اپنی تصویر کو اخبار پہ رکھ دیتے ہیں

سیکھنے اس لئے آتا ہے زمانہ ہم سے

جو نہیں جانتے دیوار پہ رکھ دیتے ہیں

جب کلی کھلنے کا منظر کبھی دکھلانا ہو

ہم حیا کو تِرے رُخسار پہ رکھ دیتے ہیں

اک نیا رنگ اُبھر آئے گا گھر میں اپنے

شاعری کو در و دیوار پہ رکھ دیتے ہیں

جانے کس شہرِ عجائب کے مسیحا ہیں یہاں

تازگی چہرۂ بیمار پہ رکھ دیتے ہیں

یوں کراتے ہیں کبھی اپنا تعارف ہم لوگ

معرفت دیدۂ بیدار پہ رکھ دیتے ہیں

فیصلہ ظالم و مظلوم کا کرنا ہو اگر

بات شبیرؓ کے انکار پہ رکھ دیتے ہیں

جانے کس دورِ یزیداں کے ہیں رہبر اپنے

امن کی فاختہ  تلوار پہ رکھ دیتے ہیں

سر تو اس معرکۂ جاں میں چلا جائے گا

اب قدم جبہ و دستار پہ رکھ دیتے ہیں

شعر فہمی کے نئے زاویے لایا ہے یہ دَور

لوگ مفہوم بھی اشعار پہ رکھ دیتے ہیں

کھیل ہو گا ہی نہیں ختم کبھی یہ نقاشؔ

ہم کہانی نئے کردار پہ رکھ دیتے ہیں

وصی الحسن نقاش