کہے نہ کچھ بھی فقط اعتراف کر ڈالے

کہے نہ کچھ بھی فقط اعتراف کر ڈالے
میں رو پڑوں تو مِرے اشک صاف کر ڈالے
کچھ ایسے نقش ہوئی دھیان میں وہ قامتِ سرو
کبھی کبھی تو شجر کے طواف کر ڈالے
میں اپنے وقت سے اس واسطے بنا کے رکھوں
یہ پھر نہ فیصلہ میرے خلاف کر ڈالے
ان آنسوؤں کے تسلسل نے ایک دن آخر
جگہ جگہ مِرے دل میں شگاف کر ڈالے
میں کیسے دیکھتی اسکی نظر کا مِیٹھا پن
ہزار عیب درونِ غلاف کر ڈالے
ہزار کوس کی دوری کے باوجود اکثر
مِری نظر نے ترے اعتکاف کر ڈالے
مجھی پہ منکشف ایسے ہوئے مِرے اشعار
بہت سے رازوں کے خود انکشاف کر ڈالے
زمانہ دیکھتا رہتا ہے سب سفید و سیہ
کہ کون وعدوں سے کب انحراف کر ڈالے
میں ایسے درد کی شدّت سے گزری رخشندؔہ
خدا نے پچھلے گنہ سب معاف کر ڈالے

رخشندہ نوید