زیادہ پی لی تھی جو کل شام کا منظر ناچا

زیادہ پی لی تھی جو کل شام کا منظر ناچا
یا پھر ایسا ہے کہ اندر کا قلندر ناچا
اب تلک چھنن چھنن چھن کی صدا آتی ہے
کون "بُلھا" تھا جو اس روح میں آ کر ناچا
اُس نے یکبار جو محفل میں اُٹھائی پلکیں
دستِ ساقی، کبھی بوتل، کبھی ساغر ناچا
دھڑکنیں وجد کُناں ہو کے ہوئیں چُپ ایسے
جب مِرے دل پہ مِرے یار کا خنجر ناچا
کیا کہیں کتنی دراڑوں نے زُباں کھولی ہے
دل کے شیشے پہ جو اِک ہِجر کا کنکر ناچا
وقتِ رُخصت مِری پلکوں سے لہو بھی نچڑا
پِھر مِرا ضبط مِری آنکھ میں آ کر ناچا
دیکھ کر ضبط مِرا دَشت نے پاؤں پکڑے
پِھر مِری پیاس پہ کہتے ہیں سمندر ناچا
یار نے دیکھ لیا ثاقبِؔ دل خستہ کو
پھر یہ پاگل سرِ محفل سرِ محشر ناچا

مجذوب ثاقب