آئین وفا اتنا بھی سادہ نہیں ہوتا

آئینِ وفا اتنا بھی سادہ نہیں ہوتا

ہر بار مسرت کا اعادہ نہیں ہوتا

یہ کیسی صداقت ہے کہ پردوں میں چھپی ہے

اخلاص کا تو کوئی لبادہ نہیں ہوتا

جنگل ہو کہ صحرا کہیں رکنا ہی پڑے گا

اب مجھ سے سفر اور زیادہ نہیں ہوتا

اک آنچ کی پہلے بھی کسر رہتی رہی ہے

کیوں ساتواں در مجھ پہ کشادہ نہیں ہوتا

سچ بات مِرے منہ سے نکل جاتی ہے اکثر

ہر چند مِرا ایسا ارادہ نہیں ہوتا

سورج کی رفاقت میں چمک اٹھتا ہے چہرہ

شبنمؔ کی طرح سے کوئی سادہ نہیں ہوتا

شبنم شکیل