عارفانہ کلام حمد نعت منقبت
شوقِ نعتِ سیدالابرارﷺ ہونا چاہیے
سامنے قرآن کا معیار ہونا چاہیے
خونِ دل صرف از پئے اشعار ہونا چاہیے
نعت گو کو حاملِ ایثار ہونا چاہیے
بختِ خفتہ اس طرح بیدار ہونا چاہیے
ان کے رُخ کا خواب میں دیدار ہونا چاہیے
جُرأتِ حق گوئی پہلی شرط ہے ایمان کی
آدمی کو صاحبِ کردار ہونا چاہیے
کر لو پیش اللہ کو دیوانگی کا عذرِ لنگ
مصطفیٰﷺ کی شان میں ہُشیار ہونا چاہیے
بارش رحمت کی رم جھم کیلئے ہے شرط یہ
نغمۂ نعت نبیﷺ ملہار ہونا چاہیے
ہو لحد میں خوش کہ ان کے شربت دیدار سے
چشم روزہ دار کا افطار ہونا چاہیے
نزع میں اے برق لب پر کلمۂ طیب کے ساتھ
نام پاکِ احمدﷺ مختارﷺ ہونا چاہیے
ڈاکٹر طلحہ رضوی برق دانا پوری
No comments:
Post a Comment