کہیں کس کو اب کہ ہے تو ہی تو تری شان جل جلالہ

 عارفانہ کلام حمد نعت منقبت

کہیں کس کو اب کہ ہے تُو ہی تُو تِری شان جل جلالہ

ہوئے ہم تو ہم سے ہی دُو بدُو تری شان جل جلالہ

تِرا حکم جاری ہے کُو بکُو تُو ہی خود نما بھی ہے سُو بہ سُو

سوا تیرے کون ہے رُو بہ رُو تری شان جل جلالہ

کبھی دُشمنوں پہ کرم کیا کبھی دوستوں پہ ستم کیا

یہ عجب طرح کی ہے تیری خُو تری شان جل جلالہ

ہے چمن بھی حُسن نما تِرا ہے گُلوں میں رنگ تِرا بھرا

کہے کیوں نہ طوطیٔ خُوش گلُو تری شان جل جلالہ

نہ دلوں میں تیرا پتہ لگا نہ بُتوں میں تیرا نشاں ملا

کہاں اب کروں تِری جُستجُو تری شان جل جلالہ

یہاں قُرب ہے نہ تو بعد ہے یہاں دِید ہے نہ شنید ہے

مِری بے نشانی ہے چار سُو تری شان جل جلالہ

یہ نفخت فیہ کا بہانہ ہے وھو معکم کا فسانہ ہے

ہے گُلِ اسد کی کچھ اور ہی بُو تری شان جل جلالہ

اسد چشتی

سید تصدق علی اسد