میں زخم آبلہ پائی سے تنگ آتا نہیں

 میں زخمِ آبلہ پائی سے تنگ آتا نہیں

ملال کیسا کوئی میرے سنگ آتا نہیں

اُسی کو آتا ہے ہر کارگرِ رمزِ حیات

مجھے تو جینے کا کوئی بھی ڈھنگ آتا نہیں

میں بے دلی پہ مگر روز مُسکراتا ہوں

عجیب شخص ہوں میں خود سے تنگ آتا نہیں

اِس آئینے میں مِرا قافلہ ہے اور میں ہوں

اِس اِک طرف سے کبھی مجھ پہ سنگ آتا نہیں

میں آ رہا ہوں وہاں سے نئی اُمید لیے

کوئی بھی لے کے جہاں سے اُمنگ آتا نہیں

یہ کیسے لفظ عجب تجھ پہ کُھل گئے یوسف

ابھی تو تجھ کو کمالِ فرہنگ آتا نہیں

یوسف عابدی