جی رہا ہوں گو کہ جینے کا مزا باقی نہیں

 جی رہا ہوں گو کہ جینے کا مزا باقی نہیں

جل رہی شمعِ ہستی اور ضیا باقی نہیں

گوشہ گوشہ جنتِ ارضی کا حبس آلود ہے

سانس کُھل کر لے سکیں اب وہ فضا باقی نہیں

ساتھ اُڑا کر لے گئیں اپنے ہوس کی آندھیاں

نقشِ پا کوئی سرِ دشتِ وفا باقی نہیں

شادمانی میں میسر تھا رفیقوں کا خلوص

غمزدہ ہوں تو کوئی درد آشنا باقی نہیں

دوستوں کی بے رُخی پر اشک افشانی نہ کر

دل کے آئینوں پہ اے عابد جِلا باقی نہیں

ابرار عابد

ابرار حسین عابدی