سرکار کہیں کھوئے ہوئے ہوش ملے ہیں

 ہر چند کہ ہر حال میں بیہوش مِلے ہیں

دیوانے مگر غم سے سبکدوش ملے ہیں

آنے کو ہم آ جائیں ابھی ہوش میں، لیکن

سرکار کہیں کھوئے ہوئے ہوش ملے ہیں

کیوں کر کبھی کرتے گِلۂ غم بھی کسی سے

ہم کو تو شبِ غم لبِ خاموش ملے ہیں

خلوت میں بھی مِلنے سے حیا آتی تھی جن کو

خوابوں میں وہی زینتِ آغوش ملے ہیں

کچھ راز تو ہے اس میں ضرور، آپ جو اخگر

اکثر شبِ مہ تاب میں خاموش ملے ہیں

اخگر مشتاق رحیم آبادی