بت کے پردے میں خدا تھا مجھے معلوم نہ تھا

 عارفانہ کلام حمد نعت منقبت

بت کے پردے میں خدا تھا مجھے معلوم نہ تھا 

لعل پتھر میں چھپا تھا مجھے معلوم نہ تھا 

ڈھونڈتا میں رہا تسبیح کے دانوں میں اسے 

ذرہ ذرہ میں خدا تھا مجھے معلوم نہ تھا 

دل نے جا جا کے کیے لاکھوں طواف کعبہ 

اور وہ دل میں چھپا تھا مجھے معلوم نہ تھا 

اسم احمدﷺ میں احد آپ چھپا بیٹھا تھا 

میم کا پردہ پڑا تھا مجھے معلوم نہ تھا 

لے کے دل غیر کا وہ دل میں مرے آ بیٹھا 

گھر میں اک چور چھپا تھا مجھے معلوم نہ تھا 

ہوش آتے ہی یہ موسیٰ کی زباں سے نکلا 

طور پہ نور خدا تھا مجھے معلوم نہ تھا 

کس نے چونکا دیا کیوں ہوش میں آیا اصغر

بیخودی میں ہی مزا تھا مجھے معلوم نہ تھا

اصغر نظامی